«Սիրելի հայրենակիցներ, եկեք պարզ խոսենք՝ ինչ է կատարվում։ Ընտրարշավին մնացել է ընդամենը մեկ շաբաթ։ Հայաստանի քաղաքական դաշտի կուսակցությունները փորձում են հանրությանը ներկայացնել իրենց ծրագրերը, իրենց մոտեցումները, իրենց տեսակետները։

Իրականում այսօր կա երկու տեսակետ՝ իշխանության և ընդդիմության։

Ի՞նչ ենք ասում մենք մեր ժողովրդին, մեր հանրությանը։ Մենք ասում ենք՝ տվեք մեզ մանդատ, տվեք մեզ հնարավորություն, կանգնեք մեր կողքին, որպեսզի երկիրը դուրս բերենք այս իրավիճակից, որովհետև Հայաստանի Հանրապետությունը կանգնած է ծանր և լուրջ մարտահրավերների առաջ։

Արցախը հայաթափվել է, գտնվում է Ադրբեջանի վերահսկողության տակ։ Ադրբեջանի զորքերը գտնվում են Հայաստանի ինքնիշխան տարածքում, ներկայացնում են նոր պահանջներ Հայաստանի նկատմամբ, իսկ գործող այս դավաճանական ոհմակը հայտարարել է, որ պատրաստվում է Հայաստանից նոր տարածքներ հանձնել։

Մենք ասում ենք՝ այն քաղաքական թիմն ենք, ունենք այն վարչապետի թեկնածուն, որը իր անցած ճանապարհով, կենսագրությամբ ու փորձով ապացուցել է, որ կարող է ապահովել մեր երկրի տարածքային ամբողջականությունը, Հայաստանի ինքնիշխանությունը, Հայաստանի քաղաքացու անվտանգությունը, մեր սահմանների անվտանգությունը և կառուցել ուժեղ, հզոր ու կայուն պետություն»,- այս մասին այսօր՝ մայիսի 29-ին, Սպիտակում քաղաքացիների հետ հանդիպման ժամանակ հայտարարեց «Հայաստան» խմբակցության պատգամավոր Իշխան Սաղաթելյանը։

Մանրամասն՝ տեսանյութում։