Իմ մուտքը ազգային ազատագրական պայքարից դեպի քաղաքականություն սկսել է այստեղեից՝ Վանաձորից։ Եվ հենց այդ պատգամավորական մանդատը ինձ լրջորեն օգնել է Ղարաբաղում հասնել այն հաջողություններին, որոնք մենք այն ժամանակ ունեցել ենք: Այս մասին այսօր՝ ապրիլի 18-ին, հայտարարեց ՀՀ երկրորդ նախագահ Ռոբերտ Քոչարյանը։ 

Այնուհետև նախագահ Քոչարյանը հարց ուղեց քաղաքացիներին՝ արդյոք ո՞րն է ամենամեծ սպառնալիիքը յուրաքանչյուր երկրի համար, և շարունակեց․

«Ես որպես մի մարդ,  որը եղել է առաջին պաշտոնում երկու երկրներում՝ և՛ Ղարաբաղում, և՛ Հայաստանում, բավական երկար ժամանակ, կարող եմ միանշանակ ասել՝ ամենամեծ սպառնալիքը յուրաքանչյուր երկրի համար՝ անհաջող առաջնորդն է այդ երկրի։ Ստախոս, տգետ, խառնակիչ։ Յուրաքանչյուր երկրի համար, որովհետև նման առաջնորդների վնասը կրկնակի վնաս է։ Առաջինը քայքայում է երկիրը ներսից, քայքայում է պետական կառույցները, լարում է ժողովրդի մի զանգվածը մյուսի դեմ, բաժանում է սև ու սպիտակների և այլն, խառնում է ընդհանրապես ինստիտուցիոնալ կառավարումը երկրում: Եվ երկրորդը նման կերպարի հետ ոչ ոք դրսում չի ուզում համագործակցել: Եվ նման կերպարը դառնում է գործիք այլ ուժերի ձեռքերում: Ուրեմն վնասը կրկնակի վնաս է՝ ներսում և դրսում:

Սա ճիշտ այն է, ինչ այսօր Հայաստանում մենք ունենք: Ներսում մենք տեսնում ենք այս մթնոլորտը, տեսնում ենք՝ ինչ է կատարվում, դրսում տեսնում ենք, թե ոնց են թշնամանում բարեկամների հետ, բայց նոր բարեկամներ չեն ստեղծում և ոնց են գործիք դառնում աշխարհաքաղաքական տարբեր կենտրոնների ձեռքում: Այս ամեն ինչի գինը վճարում է մեր ժողովուրդը: Հայաստանի Հանրապետությունը:

Իմ գնահատականը հետևյալն է․ մենք ունենք ադեկվատությունը կորցրած առաջնորդ: Փորձեմ զուտ երկու օրինակով նաև ամրացնել իմ այս պնդումը: Վերջերս մի հանճարեղ միտք հնչեց, որ Հայաստանի անվտանգության երաշխավորը Ադրբեջանն է: Ես չգիտեմ՝ ինչ պետք է կատարվի մարդու գլխում, որ այսպիսի միտք ի հայտ գա: Սա նույնն է, որ օրինակ Պաղեստինի ժողովուրդը հայտարարի, որ իրենց անվտանգության երաշխավորը Իսրայելն է և վարչապետ Նեթանյահուն: Այն ամեն ինչից հետո, երբ Ինչ կատարվեց այնտեղ․ 70 000-ից ավել զոհ, որից 2/3-ը կին և երեխա է: Հնարավո՞ր է այսպիսի բան։ Ուղղակի հնարավոր չէ:

Ինչի՞ համար է սա արվում: Մեկ պարզ բանի համար, որ խաղաղության թեման դառնա մահակ Հայաստանի Հանրապետության քաղաքացու կամքի վրա ճնշելու համար, կամքին հարվածելու համար: Այլ բացատրություն այստեղ չկա: Պատրա՞ստ ենք մենք դա հանդուրժել: Կարծում եմ՝ ո՛չ: Եվ ընդհանրապես խաղաղության թեման չպետք է դառնա ընդհանրապես այս ընտրությունների համար ժողովրդի վրա ճնշում գործադրելու թեմա»,- նշեց նա:

Մանրամասն՝ տեսանյութում։