«Ես հիշեցնեմ մինչև էթնիկ զտումը եղել է ինը ամսվա տոտալ շրջափակում։ Մարդիկ սոված էին, բարեկամներս այնտեղ էին ու այդ ինը ամսվա ընթացքում մատը մատին ինքը կոնկրետ և ՔՊ-ն չխփեց նույնիսկ հումանիտար օգնություն հասցնելու համար: Եվ դրանից հետո ասել փախա՞ծ եք, ուրեմն այդ աղջիկը պետք է երեխայով, այդ կինը պետք է այդ փոքր երեխայի հետ մնար այնտե՞ղ, որ դու հանգստանայի՞ր: Սա մի խայտառակություն է»,- «Մեծ քաղաքականություն» փոդքասթի երրորդ թողարկման ժամանակ ասաց ՀՀ երկրորդ նախագահ Ռոբերտ Քոչարյանը՝ մեկնաբանելով Նիկոլ Փաշինյանի և Արցախից բռնի տեղահանված կնոջ կոնֆլիկտը, երբ Փաշինյանը անչափահաս երեխայի ներկայությամբ արցախցիներին անվանեց «փախածներ»:
«Ինքը վստահ է, որ ամեն ինչ կմարսի: 5000 զոհ տված, պատերազմում պարտվածը ո՞նց է մարսել, ընտրվել: Միգուցե մի քիչ այլ դաշտից օրինակ բերեմ: Ծնողը նույնիսկ ամենալկտի երեխային, իր երեխային ամեն ինչ ներում է, չէ՞, ամեն ինչ ներում է։ Փորձում է ինչ-որ բացատրել, ջան-ջիգյարով և այլն, ամեն ինչ ներում է։
Երբ մի ընտրազանգված չափից շատ սիրում է ղեկավարին, այդ ղեկավարին լկտիացնում է այդ սիրով, որովհետև այդ ղեկավարը սկսում է մտածել՝ ինչ ուզեմ կանեմ, մեկ է հետո կֆռցնեմ, կմանիպուլյացնեմ: Այդ էֆեկտը աշխատում է: Ժողովրդի մի մասը որդեգրել է իրականում քաղաքականապես թերհաս Նիկոլ Փաշինյանին և պատրաստ է ներել ամեն ինչ։ Ներել 5000 զոհ, ներել հսկայական կորուստներ։
Սա ավելի շատ հոգեբանական այսպիսի մի գործոն է, բայց մի պահ է գալիս, որ մարդիկ պետք է արթնանան: Ես շատ եմ նմանացնում այս վիճակը Սահակաշվիլիի վիճակի հետ։ Զուգահեռները շատ էին: Նույնիսկ այն ժամանակ, երբ երեք օրում իրենք պատերազմ սկսեցին Հարավային Օսիայում, պարտվեցին, հինգ օրում ջախջախվեցին, ըստ էության, և դրանից հետո ներվեց և Սահակաշվիլին շարունակում էր ղեկավարել։ Շատ նման է։ Այն ժամանակ, եթե չեմ սխալվում, Նիկոլ Փաշինյանը նամակ գրեց Սահակաշվիին։
Հետո եկավ մի պահ, որ Սակաշվիլին պարտվեց և հիմա բանտում է գտնվում։ Իրենց ճակատագրերը շատ նման են իրար։ Պարտություն բերած, սիրված, հետո այդ սերը 180 աստիճանով փոխված առաջնորդի ճակատագիր է։ Նույնը սպասվում է Նիկոլ Փաշինյանին»,- հավելեց նա։
Մանրամասն՝ տեսանյութում։
