ՀՀ կառավարությունն իր այսօրվա՝ փետրվարի 26–ի նիստում որոշում ընդունեց, որով հստակեցվում են 2026 թվականի պետական բյուջեով նախատեսված սոցիալական փաթեթների տրամադրման կարգն ու չափաքանակները։ Այս որոշմամբ կապահովվեն հանրային հատվածի աշխատողների առողջապահական և հանգստի կարիքները։
«Նախագծի նպատակն է սոցփաթեթի հատկացումները դարձնել ավելի հասցեական և ճշգրիտ։ Ըստ փաստաթղթի՝ ծրագիրն ընդգրկում է ավելի քան 133 000 շահառուի, իսկ ընդհանուր բյուջեն կազմում է 9.6 միլիարդ դրամ, որը բաշխվում են ըստ հանրային իշխանության և տարածքային կառավարման մարմինների»,- նշված է նախագծում:
Ի տարբերություն նախորդ տարիների, այս անգամ հիմքում դրվել է ոչ թե գերատեսչությունների ներկայացրած նախնական հայտերը, որոնք կազմում էին շուրջ 11 մլրդ դրամ, այլ նախորդ տարվա փաստացի ծախսերը։ Կառավարությունը հիմնավորում է, որ սա արվել է բյուջետային միջոցները խնայելու և դրանք «թափուր հաստիքների» վրա չպլանավորելու համար։
Սակայն փոփոխություններում ներառված չեն Երևանի քաղաքապետարանի ենթակայության դպրոցների և Մետրոպոլիտենի աշխատակիցների սոցփաթեթի գումարները:
Կառավարությունը վստահեցնում է, որ եթե տարվա ընթացքում թափուր տեղերը զբաղեցվեն կամ կառուցվածքային փոփոխություններ լինեն, գումարների պակաս չի զգացվի։ Աշխատանքի և սոցիալական հարցերի նախարարությունը կկատարի անհրաժեշտ վերաբաշխումներ։
Գործադիրը վստահեցում է, որ փոփոխությունների հիմնական նպատակը պետական համակարգում աշխատողների մոտիվացիայի բարձրացումն ու սոցիալական երաշխիքների շարունակականության ապահովումն է։ Սա նշանակում է, որ 2026 թվականին սոցփաթեթի շահառուները կշարունակեն անխափան օգտվել իրենց հասանելիք ծառայություններից։
