«Հայաստանի էլեկտրական ցանցեր» ընկերությունը կարող է գերակա հանրային շահ ճանաչվել, եթե պետության և սեփականատիրոջ միջև համաձայնություն ձեռք չբերվի։ Այս մասին փետրվարի 16-ին լրագրողների հետ հանդիպման ժամանակ հայտարարել է Հայաստանի Հանրային ծառայությունները կարգավորող հանձնաժողովի (ՀԾԿՀ) նախագահ Մեսրոպ Մեսրոպյանը:
Նա պարզաբանել է, որ ընկերությանը լիցենզիայից զրկելուց հետո երեք ամսվա ընթացքում պետությունը պետք է բանակցություններ սկսի, սեփականատիրոջը որոշակի գումար առաջարկի և փորձի հետ գնել այն։ Նրա խոսքով՝ այդ եռամսյա ժամկետը դեռ չի ավարտվել։
Մեսրոպյանը ենթադրել է, որ մոտ ժամանակներս համապատասխան պետական մարմինների կողմից այդ մասին պարզաբանում կտրվի։ «Եթե այդ ժամկետի շրջանակում կողմերը համաձայնության չգան, ընկերության բաժնետոմսերի և գույքի օտարումը կշարունակվի՝ այն գերակա հանրային շահ ճանաչելու միջոցով», — եզրափակել է Մեսրոպյանը:
