Իրանում իրավիճակը վերահսկողության տակ է վերցված։ Այս մասին հայտարարել է Իրանի արտաքին գործերի նախարար Աբբաս Արաղչին օտարերկրյա դեսպանների հետ հանդիպման ժամանակ։
Նա նշել է, որ բողոքի ցույցերը սկզբից՝ դեկտեմբերի 28-30-ը, եղել են լիովին խաղաղ, մասնակիցների մեծ մասը աշխատել է առևտրի ոլորտում։
«Այդ ընթացքում ցուցարարները խաղաղ կերպով արտահայտել են իրենց օրինական պահանջները։ Սկզբում, երեք օրվա ընթացքում, ցուցարարների և կառավարության միջև երկխոսություն է տեղի ունեցել, և բողոքի ցույցերը գրեթե ավարտվում էին», — հայտարարել է Արաղչին։
Նախարարը նշել է, որ «ավելի ուշ զինված ահաբեկիչները միացել են բողոքի ցույցերին, և այդպիսով խաղաղ ցույցերը անցել են բողոքի ցույցերի սահմաններից՝ վերածվելով անկարգությունների»։
Նա հայտարարել է նաև, որ Թեհրանը պատրաստ է բանակցություններ վարել Միացյալ Նահանգների հետ, սակայն դրանք պետք է հիմնված լինեն փոխադարձ հարգանքի վրա՝ անդրադառնալով ԱՄՆ նախագահ Դոնալդ Թրամփի ավելի վաղ արված հայտարարությանը, որ Իրանը կոչ է արել բանակցություններ սկսել իր միջուկային ծրագրի շուրջ և որ Վաշինգտոնը կարող է հանդիպել Իրանի ներկայացուցիչների հետ, գրում է Reuters-ը։
«Ինչպես նախկինում բազմիցս ասել եմ, մենք նույնպես պատրաստ ենք բանակցությունների, բայց արդար, հավասար դիրքերից և փոխադարձ հարգանքի հիման վրա. բանակցությունների, որոնք կլինեն իրական ու լուրջ, այլ ոչ թե թելադրանքի և հրահանգների տեսքով», — ասել է Արաչին։ Օտարերկրյա պետությունների դեսպանների առջև նրա ելույթից մի հատված է հրապարակել իրանական հեռուստատեսությունը։
