«Հայաստան» խմբակցության պատգամավոր Մհեր Մելքոնյանը գրում է․ «Այսօր մեր պետությունը կանգնած է արժեքային ամենախորքային ճգնաժամի առաջ՝ քաղաքական բարոյականության բացակայության։
Եվ այստեղ պետք է հստակ արձանագրել. գործող իշխանությունը վաղուց կորցրել է քաղաքական բարոյականությունը, և այդ կորուստն արդեն արտահայտվում է բոլոր առանցքային ոլորտներում՝ որոշումների կայացման տրամաբանությունից մինչև հասարակության հետ հարաբերությունների կառուցվածք:
Վերջին տարիներին մենք տեսնում ենք ոչ թե սխալի կամ խափանման հետևանք, այլ համակարգային օրինաչափություն, որտեղ հաշվետվողականությունը փոխարինվել է ինքնարդարացմամբ, թափանցիկությունը՝ անորոշությամբ, իսկ պետական շահը՝ իշխանության ներքին շահերով։
Այստեղ է սկսվում ճգնաժամի իրական խորքը․ երբ քաղաքական որոշումները կայացվում են ոչ թե սկզբունքների, այլ իշխանությունը պահպանելու տրամաբանությամբ, պետությունը զրկվում է ռազմավարական տեսլականից։
Վստահության կորուստը դառնում է ինստիտուցիոնալ թուլության հիմնական աղբյուրը,
իսկ այդ թուլությունը՝ ազգային անվտանգության խնդիր։
Այս իրավիճակում պարզ է դառնում մեկ բան։ Խնդիրը միայն վատ կառավարումը չէ։
Խնդիրը բարոյական հիմքի բացակայությունն է, որը զրկում է իշխանությանը ժողովրդի հետ երկխոսելու, պատասխան տալու և առաջ տանելու կարողությունից։
Փաշինյանական իշխանության քաղաքական բարոյականության կորուստը փաստ է. և այդ կորուստը վաղուց սպառնում է պետության կայունությանը։
Պետությունը չի կարող զարգանալ այն պայմաններում, որտեղ իշխանությունն առաջնորդվում է ոչ թե սկզբունքներով, այլ իրավիճակային հաշվարկներով։
Քաղաքական բարոյականության վերականգնումը դարձել է ոչ թե քաղաքական ցանկություն,
այլ պահանջ՝ երկրի կայունությունը և անվտանգությունը պահպանելու համար»:
