Կառավարությունը այսօր՝ նոյեմբերի 20-ի նիստում, համաձայնությւոն տվեց Հայաստանի Հանրապետության և Ասիական զարգացման բանկի միջև «Կենսունակության բարելավման և հզորացման համար բնակարանային բարեփոխումներ» վարկային 250 մլն դոլար արժողությամբ ծրագրին։ Նպատակ ունի զարգացնել կայուն, դիմացկուն և ներառական բնակարանային համակարգ Հայաստանում՝ աջակցելով փախստականների սոցիալ-տնտեսական ինտեգրմանը և բարեկեցությանը։
Կառավարության հիմնավորման մեջ նշվում է, որ ծրագրի ֆինանսավորումն իրականացվելու է Ասիական Զարգացման Բանկի (այսուհետ՝ ԱԶԲ) և Արտոնյալ ֆինանսավորման գլոբալ գործիքի հիմնադրամի (GCFF) միջոցների հաշվին։
Ծրագրի շրջանակներում նախատեսվում է ԱԶԲ-ի կողմից Հայաստանի Հանրապետությանը տրամադրել 250,000,000 ԱՄՆ դոլարի չափով վարկ։
Վարկավորման պայմանները հետևյալն են՝
- Վարկի գումար` 250 մլն ԱՄՆ դոլար,
- ծրագրի համաֆինանսավորում` գլոբալ գործիքի հիմնադրամի կողմից տրամադրվող դրամաշնորհային միջոցներ 16,450,000 ԱՄՆ դոլար գումարի չափով,
- վարկային միջոցների մասհանման վերջնաժամկետ՝ 12.2030թ.,
- վարկի տոկոսադրույքի տեսակ՝ լողացող,
- վարկի տարեկան տոկոսադրույք՝ SOFR + 0.8% մարժա: Հաշվի առնելով 30.10.2025թ. ձևավորված SOFR-ի տոկոսադրույքը՝ 4.04%, վարկի լողացող տոկոսադրույքը կկազի 4.84%,
- պարտավորության վճար՝ տարեկան 15% դրույքաչափ, հաշվարկվում է վարկի չմասհանված գումարի նկատմամբ, հաշվարկման սկիզբ է համարվում պայմանագրի ստորագրման ամսաթվից հետո 60-րդ օրը, վճարվում է կիսամյակային կտրվածքով, տոկոսավճարների վճարման հետ միաժամանակ,
- վարկի մայր գումարի մարումները փոխկապված են վարկի ամբողջ գումարին և մարման եղանակն է հավասարաչափ վճարումներ,
- մայր գումարը ենթակա է մարման 34 հավասարաչափ կիսամյակային վճարումներով` 15.12.2035թ-ից մինչև 15.06.2052թ,
- վարկի ժամկետը 27 տարի, որից արտոնյալ ժամկետ՝ 10 տարի,
- Վարկառուն ցանկացած ժամանակ կարող է դիմել ԱԶԲ-ին` խնդրելով կատարել վարկավորման պայմանների հետևյալ փոփոխությունները`
- փոխարկել ամբողջությամբ կամ մասնակիորեն վարկի օգտագործված և չմարված գումարի կամ չմասհանված գումարի արժույթը Բանկի համար ընդունելի մեկ այլ արժույթի,
- փոխարկել վարկի օգտագործված և չմարված գումարի կամ դրա մի մասի տոկոսադրույքը լողացողից ֆիքսվածի և հակառակը:
- վարկի սպասարկման գծով վճարումները կատարվում են կիսամյակային կտրվածքով` յուրաքանչյուր տարվա հունիսի 15-ին և դեկտեմբերի 15-ին:
