Մայրաքաղաքում խցանումները որոշակի տնտեսական գործունեության հետեւանք են։ Այս մասին հոկտեմբերի 31-ին խորհրդարանական մշտական հանձնաժողովների համատեղ նիստում՝ 2026թ․ պետական բյուջեի նախագծի քննարկման ժամանակ, հայտնել է Երեւանի քաղաքապետ Տիգրան Ավինյանը։
Նրա խոսքով՝ մարդիկ սկսել են ավելի շատ մեքենաներ գնել։
«Միայն Երեւանում անցյալ տարի գրանցվել է 11 հազար նոր մեքենա։ Եվ դա չի ներառում հարեւան շրջաններում գրանցված մեքենաները։ Դրանք եւս երթեւեկում են Երեւանի փողոցներով»,- ասել է Ավինյանը։
Քաղաքապետը ներկայացրել է քաղաքում երթեւեկության խցանումները նվազեցնելու մի շարք առաջարկներ, որոնք քննարկվել են քաղաքապետարանում։
Նրա խոսքով՝ քաղաքապետարանի մասնագետները կրկին իրենց ուշադրությունը կենտրոնացնում են հասարակական տրանսպորտի ավտոբուսային գծերի թվի ավելացման վրա՝ մասնավոր տրանսպորտային միջոցների համար որոշակի սահմանափակումներ մտցնելով։
«Աշխարհը դեռ այլ մեխանիզմ չի մտածել»,- ավելացրել է Ավինյանը։
