Պորտուգալիայում այսօր հայտարարվել է ազգային սգո օր՝ Լիսաբանում պատահած ողբերգական պատահարի հետևանքով։ Մայրաքաղաքում սուգը եռօրյա է։
Հիշեցնենք, որ քաղաքի հայտնի ֆունիկուլյորը դուրս է եկել ճոպանուղու ռելսերից և բախվել հարակից շենքին։ Միջազգային ԶԼՄ-ների փոխանցմամբ, զոհվել է 15 մարդ, ևս 18 մարդ ստացել է տարբեր աստիճանի վնասվածքներ։ Վիրավորներից հինգը գտնվում են ծանր վիճակում։ Տուժածների թվում մեկ երեխա կա, ըստ պաշտոնական հաղորդագրության, նա աննշան վերքեր ունի։
19-րդ դարում բացված երկաթուղին Լիսաբոնի կենտրոնը կապում է վերին թաղամասի հետ և հայտնի է զբոսաշրջիկների շրջանում։ Դեպքը տեղի է ունեցել, երբ տրանսպորտային միջոցն իջնում էր զառիթափից։
«Այն ուժգին հարվածել է շենքին և փլուզվել՝ ինչպես ստվարաթղթե տուփ», -պատմել է ականատես մի կին։
Վթարի պատճառը դեռևս անհայտ է, սակայն ոստիկանության, ազգային տրանսպորտային անվտանգության մարմնի և 140-ամյա «Գլորիա» ճոպանուղին շահագործող ընկերության կողմից անցկացվում են հետաքննությունները։
Դեռևս պարզ չէ, թե քանի մարդ է եղել ճոպանուղում։ Լիսաբոնի քաղաքապետ Կառլոս Մոեդասը միջադեպը որակել է որպես «քաղաքի համար ողբերգական պահ։
