Իրանը դատապարտել է Իսրայելի հարձակումը Սիրիայի տարածքների վրա՝ շեշտելով, որ աջակցում է Սիրիայի ինքնիշխանությանն ու տարածքային ամբողջականությանը։
Այս մասին X-ի միկրոբլոգում գրառում է կատարել Իրանի արտաքին գործերի նախարար Աբբաս Արաղչին։
«Դժբախտաբար, սա չափազանց կանխատեսելի էր։ Ո՞ր մայրաքաղաքն է հաջորդը։ Իսրայելական կատաղի ռեժիմը սահմաններ չի ճանաչում և հասկանում է միայն մեկ լեզու։ Աշխարհը, այդ թվում՝ տարածաշրջանը, պետք է միավորվի՝ վերջ դնելու նրա խելագար ագրեսիային», – նշել է Արաղչին գրառման մեջ։
Նա նաև շեշտել է, որ «Իրանն աջակցում է Սիրիայի ինքնիշխանությանը և տարածքային ամբողջականությանը և միշտ կկանգնի սիրիացի ժողովրդի կողքին»։
Ավելի վաղ Իրանի արտաքին գործերի նախարարության խոսնակ Էսմայիլ Բաղային խստորեն դատապարտել էր վերջին օրերին Սիրիայի դեմ Իսրայելի կողմից իրականացված հարձակումները՝ նաև մտահոգություն հայտնելով աս-Սուեյդայի շրջանում վերջին բախումների կապակցությամբ։
Աշխարհի տարբեր երկրներ, ինչպես նաև միջազգային կառույցներ դատապարտել են Իսրայելի ագրեսիան Սիրիայի նկատմամբ։
Սիրիայի մարդու իրավունքների դիտորդական կենտրոնի տեղեկություններով՝ Սիրիայի հարավային աս-Սուեյդայի նահանգում դրուզների և բեդվին ցեղերի միջև բախումների հետևանքով զոհվել է 356 մարդ։ Սիրիայի պաշտպանության և ներքին գործերի նախարարությունների ուժերը մտել էին աս-Սուեյդա՝ փորձելով վերահսկողություն հաստատել խնդրահարույց թաղամասերի նկատմամբ։
Իսրայելը թիրախավորել էր Դամասկոսում գտնվող Սիրիայի զինված ուժերի գլխավոր շտաբի տարածքը, ինչպես նաև ավիահարվածներ էր հասցրել աս-Սուեյդայի նահանգի տարբեր շրջանների՝ պահանջելով դադարեցնել դրուզների դեմ գործողությունները։ Սիրիայի բանակը հայտարարել է, որ սկսել է դուրս գալ աս-Սուեյդայից։
Unfortunately, this was all too predictable. Which capital is next?
The rabid Israeli regime knows no bounds and only grasps one language. The world, including the region, must unite to end its unhinged aggression.
Iran supports the sovereignty and territorial integrity of… pic.twitter.com/93kueERy2S
— Seyed Abbas Araghchi (@araghchi) July 16, 2025
