Ավան և Նոր Նորք վարչական շրջանների ընդհանուր իրավասության դատարանում՝ դատավոր Արտակ Կարապետյանի գլխավորությամբ, քիչ առաջ ավարտվեց ԱԺ «Հայաստան» խմբակցության պատգամավոր, «Սրբազան պայքար» շարժման անդամ Արթուր Սարգսյանին կալանավորելու միջնորդության քննարկումը։ Դատարանի որոշումը կհրապարակվի ժամեր անց։ Այս մասին հայտնեցին Սարգսյանի փաստաբանները։
Նրանց խոսքով ծավալուն քննարկումներ են եղել թե՛ հիմնավոր կասկածի և թե՛ խափանման միջոցի վերաբերյալ։ Դատավորին բացարկի միջնորդություն է ներկայացվել, որը մերժվել է, հիմքն այն է, որ ի սկզբանե գործը պետք է քննվեր Աջափնյակի դատարանում, սակայն այն մակագրվել է վերոնշյալ դատավորին, ինչում նրանք միտում են տեսել, հաշվի է առնվել նաև այն, որ դատավոր Արտակ Կարապետյանը բավարարել է գործարար Սամվել Կարապետյանի կալանքի միջնորդությունը։
Հիշեցնենք՝ Արթուր Սարգսյանին մեղադրանք է առաջադրվել ահաբեկչություն նախապատրաստելու, իշխանությունը զավթելու հոդվածներով: Ըստ գլխավոր դատախազության՝ նա մեղադրվում է հարվածային խմբերում ցուցարարներ հավաքագրելու մեջ:
