Իրանի հետ շարունակվող հակամարտության ֆոնին, Իսրայելի վարչապետ Բենիամին Նեթանյահուն ժամանել է Թել Նոֆի ավիաբազա: Պաշտպանության նախարար Իսրայել Կացի և շտաբի պետ, գեներալ-լեյտենանտ Էյալ Զամիրի ուղեկցությամբ նա հանդիպել է զինվորական անձնակազմի և հրամանատարական կազմի հետ, հայտնում է cursorinfo.co.il կայքը:
Իր խոսքում Նեթանյահուն ընդգծել է Իսրայելի ռազմաօդային ուժերի կարևոր դերը ներկայիս գործողության մեջ։
«Իսրայելի ռազմաօդային ուժերը վերահսկում են Թեհրանի երկինքը։ Սա փոխում է արշավի ամբողջ ընթացքը», — ասել է նա։
Իսրայելի ղեկավարի խոսքով՝ հարվածները հասցվում են «բացառապես» Իրանի ռազմական թիրախներին։
Նա շեշտել է, որ իսրայելական բանակի գործողությունները մոտեցնում են երկու հիմնական նպատակների իրականացումը՝ «միջուկային և հրթիռային սպառնալիքների ոչնչացումը… Մենք հաղթանակի ճանապարհին ենք։ Եվ սա հնարավոր դարձավ մեր հերոս օդաչուների շնորհիվ… Ես ողջունում եմ ձեզ, Իսրայելի բոլոր քաղաքացիները ողջունում են ձեզ», — ասել է Նեթանյահուն։
