Ռազմական փորձագետ Վիտալի Մանգասարյանը գրել է․
«Արցախի բռնազավթված տարածքներում Ադրբեջանի կողմից կառուցված երեք օդանավակայանները՝ Ֆուզուլիում (2021), Զանգելանում (2022) և վերջերս՝ Լաչինում (2025), ռազմական նշանակություն ունեն։
Այս օդանավակայանները,ռազմական տեղակայման վայրեր լինելով, պլացդարմ են դառնում տարածաշրջանային լայնամասշտաբ ռազմական ծրագրերի համար։
Այս համատեքստում պատահական չէ համընկնումը՝ օդանավակայանների շինարարության ավարտը և Իսրայելի ու Իրանի միջև հակամարտության սրումը։
ԶԼՄ-ներում շրջանառվող տեղեկատվության, իսրայելական կողմը պաշտոնապես տեղեկացրել է ԱՄՆ-ին իր պատրաստակամության մասին՝ հարվածելու Իրանի միջուկային օբյեկտներին։
Ըստ The Washington Post-ի՝ ամերիկյան հետախուզությունը ևս հաստատել է՝ Իսրայելը մտադիր է կտրուկ քայլերով կանգնեցնել Իրանի այսպես կոչված միջուկային ծրագիրը։
Այս համատեքստում ակնհայտ է, որ իսրայելական կողմը կարող է օգտագործել Ադրբեջանում կառուցված օդանավակայանները իրանական կողմի դեմ գործողություններ իրականացնելու համար։
Օդանավակայանների աշխարհագրական դիրքը՝ հարավում Զանգելան, կենտրոնում Ֆուզուլի, իսկ հյուսիսում Լաչին, հնարավորություն են տալիս ձևավորել «օդային կամուրջ» դեպի Իրանի հյուսիս-արևմուտք։
Իրանի նախագահ Մասուդ Փեզեշքյանը, արձագանքելով զարգացումներին, շեշտել է, որ «մեզանից պահանջում են հրաժարվել մեր հնարավորություններից, որպեսզի Իսրայելը կարողանա ռումբեր նետել մեր գլխին», ընդգծելով, որ Իրանը չի ձգտում միջուկային զենք ստեղծել, այլ պայքարում է իր իրավունքների համար։
Հայաստանի ռազմաքաղաքական ղեկավարության վարքագիծը այս պայմաններում ոչ միայն անպատասխանատու է, այլ նաև չափազանց վտանգավոր։ Փաստացի, երբ մեր սահմաններին կուտակվում են տարածաշրջանային բախումների իրական սպառնալիքները, իսկ Նախիջևանում այսօրվանից մեկնարկում է թուրք-ադրբեջանական հերթական խոշորամասշտաբ զորավարժությունը՝ ուղիղ Հայաստանի հարավային դարպասների դիմաց, ՀՀ ռազմաքաղաքական ղեկավարությունը, փոխանակ զբաղվի երկրի անվտանգության հարցերով, զբաղված է քեռակնոջ համապատասխան տեղում թիթեռ նկարելով»։
