Լոս Անջելեսի կենտրոնում կիրակի օրը ձերբակալվել է ընդհանուր առմամբ 27 մարդ, լրագրողներին հայտնել է Լոս Անջելեսի ոստիկանության պետ Ջիմ ՄաքԴոնելը երեկոյան մամուլի ասուլիսի ժամանակ։ ՄաքԴոնելը նշել է, որ ենթադրյալ հանցագործությունների թվում են ոստիկանի վրա Մոլոտովի կոկտեյլ նետելը և մոտոցիկլետով ոստիկանական շարքին մխրճվելը։
CNN-ի վկայությամբ՝ ոստիկանությունը օգտագործել է լուսաձայնային կրակոցներ և արցունքաբեր գազ՝ ամբոխը ցրելու համար, ոմանք ձերբակալություններ կատարելիս հարվածել և հրել են ցուցարարներին։ Ցուցարարները հրկիզել են առնվազն երկու ինքնագնաց մեքենա։ Լոս Անջելեսի ամբողջ կենտրոնը հայտարարվել է անօրինական հավաքների տարածք։
Մոտ 300 Ազգային գվարդիայի զինծառայողներ տեղակայվել են տարածքում, այն բանից հետո, երբ նախագահ Դոնալդ Թրամփը պահանջել է դա՝ դաշնային անձնակազմը և սեփականությունը պաշտպանելու համար: Սա տասնամյակների ընթացքում առաջին դեպքն է, երբ նախագահը Ազգային գվարդիան կանչում է առանց նահանգի հարցման կամ համաձայնության: Տեղակայելու պատրաստ են նաև 500 ծովային հետևակայիններ:
Կալիֆորնիայի նահանգապետ Գևին Նյուսոմը հայտարարել է, որ նահանգը դատական հայց կներկայացնի Թրամփի վարչակազմի դեմ՝ Ազգային գվարդիայի տեղակայման վերաբերյալ, որը նա և Լոս Անջելեսի քաղաքապետ Կարեն Բասը որակել են սադրիչ։
Իրավապահների և ցուցարարների միջև բախումները շարունակվում են մի քանի օր՝ միգրացիոն գործակալների կողմից ներգաղթյալների ձերբակալելուց հետո։
Նյուսոմը հայտարարել է նաև, որ Թրամփը «ճգնաժամ է ստեղծել և ավելի է վատթարացնում իրավիճակը» Լոս Անջելեսում:
Նահանգապետը կոչ է արել ԱՄՆ նախագահին «հետ քաշվել»: Նյուսոմը նշել է, որ իրավախախտները կձերբակալվեն, և տեղական պաշտոնյաները պլանավորում են ապահովել խաղաղ ցուցարարների և օրենքի շրջանակներում գործող իրավապահ մարմինների աշխատակիցների անվտանգությունը։
«Ժողովրդավարությունը վտանգված է։ Դոնալդ Թրամփը ձեզ օգտագործում է որպես պատրվակ քաղաքը ռազմականացնելու և մեր ժողովրդավարությունը շրջանցելու համար։ Դոնալդ Թրամփը պետք է նահանջի», — սոցիալական ցանցերում գրել է նահանգապետը։
Ավելի վաղ Դոնալդ Թրամփը Կալիֆորնիայի Ազգային գվարդիան ուղարկել էր Լոս Անջելես՝ բողոքի ցույցերը ճնշելու համար: Կալիֆորնիայի իշխանությունները մեղադրել էին ԱՄՆ նախագահի վարչակազմին «ներկայացում», «խելագարություն» բեմադրելու և սեփական քաղաքացիներին վախեցնելու փորձերի մեջ:
Լոս Անջելեսում ներգաղթյալների արտաքսման դեմ բողոքող ցուցարարները փակել են փողոցներ, հրավառ նյութեր կիրառել, այրել աղբամաններ և ծածանել մեքսիկական դրոշներ, ձերբակալվել է 40 մարդ, հայտնում է CNN-ը:
Սպիտակ տունը կատարվածը որակել է «ապստամբություն», նախագահ Դոնալդ Թրամփը կարգադրել է քաղաք մտցնել Ազգային գվարդիայի 2,000 զինվոր՝ կարգուկանոնը վերականգնելու համար:
Պնդելով, որ տեղական իշխանությունները չեն կարողացել հաղթահարել անկարգությունները՝ Թրամփը նշել է, որ դաշնային կառավարությունը «ապստամբների և թալանչիների խնդիրը կլուծի այնպես, ինչպես այն պետք է լուծվի»:
