«Մայր Հայաստան» դաշինքի առաջնորդ Անդրանիկ Թևանյանը ֆեյսբուքյան եթերով անդրադարձել է Նիկոլ Փաշինյանի և Աննա Հակոբյանի ֆեյսբուքյան ոչ կոռեկտ բառապաշարով գրառումներին:
«Նիկոլ Փաշինյանն ու Աննա Հակոբյանը ձախողվել ու տապալվել են բոլոր ոլորտներում: Հիմա փորձում են քաղաքական բանավեճի մեջ առաջ մղել ձևը և հետ մղել բովանդակությունը, որովհետև բովանդակային դաշտում ասելիք չկա»,- ասել է Թևանյանը և ընդգծել, թե ինչու են նրանք նման ձևակերպումներով և հատկապես հարձակվել Հայ Առաքելական Եկեղեցու վրա:
«Այս օրերին տեղի ունեցավ մի իրադարձություն, որին Նիկոլ Փաշինյանը նույնպես պետք է արձագանքեր, որպեսզի իր հավատարմությունը ցույց տար Ալիևին և նրանից շարունակեր մուրալ խաղաղության փաստաթուղթ: Ամենայն Հայոց Կաթողիկոսի առաջարկով Եկեղեցիների համաշխարհային խորհրդի համաժողով էր տեղի ունեցել, որի ընթացքում Գարեգին երկրորդի շուրթերից հնչել էին ձևակերպումներ՝ Արցախի, ադրբեջանական ագրեսիայի և հայ ռազմագերիների դատավարության հետ կապված, որը դուր չէր եկել Ադրբեջանի հոգևոր առաջնորդ Փաշազադեին: Փաշազադեի խոսքերը որպես ցուցում ընկալեց Նիկոլ Փաշինյանը և հարձակվեց Հայ Առաքելական եկեղեցու վրա՝ ցույց տալով իր հավատարմությունը Ալիևին»,- նշել է Թևանյանը և հավելել, որ Նիկոլ Փաշինյանին պետք է հակադրվել՝ ոչ թե նրա մակարդակին իջնելով, այլ նրան պետք է մղել լուսանցք, թողնել, որպեսզի այդ մարգինալ բառապաշարով ինքն իր հյութի մեջ եփվի, և դրան հակադարձել բովանդակային խոսքը, չմտնել անձնական վիրավորանքների տիրույթ:
