ՌԴ ԱԳՆ պաշտոնական ներկայացուցիչ Մարիա Զախարովան այսօր կազմակերպված ամենշաբաթյա բրիֆինգի ընթացքում ՀՀ ԱԺ խոսնակ Ալեն Սիմոնյանին վերագրեց արևմտյան ու բրյուսելյան «методичка»-ների կիրառումը Ռուսաստանի հետ հարաբերությունների հարցում։ Անդրադառնալով Ալեն Սիմոնյանի նախօրեի հայտարարություններին, թե ՌԴ-ն մեծ գումարներ է ծախսում ՀՀ-ում հիբրիդային պատերազմի համար, Զախարովան նշեց, որ սա ագրեսիվ հռետորաբանության հերթական փուլն է, որը զարմանք է հարուցում։
«ՀՀ ղեկավարության նկատմամբ ի՞նչ հիբրիդային պատերազմի մասին կարող է խոսք լինել, եթե, ինչպես մենք հասկանում ենք, Հայաստանն այստեղ ներկայացված է լինելու միջոցառումներին և բարձրաստիճան շփումն ընթանում է բնականոն հունով, ինչպես նաև ԱԳՆ գծով»,- ասաց Զախարովան։
Նրա կարծիքով, ՀՀ ԱԺ խոսնակի հայտարարություններում անհամապատասխանություն կա։
«Երևի թե պետք է ընդհանուր դիրքորոշում մշակել այս հարցի շուրջ։ Ես չեմ պատկերացնում իրավիճակ, որից նա խոսում է՝ գուցե ինչ-որ մեկի հրահրմամբ, կարող էր իրականում տեղի ունենալ։ Գոնե փաստեր ինչ-որ մեկը կկարողանա՞ ներկայացնել։ Սա այլևս անտանելի է, սա ինչ-որ բրյուսելյան մեթոդաբանության կիրառում է, անարժան է»,- նկատեց նա։
Զախարովան , անդրադառնալով նաև Երևանի Նոր Նորքի թաղապետարանում թաղապետի մասնակցությամբ տեղի ունեցած ծեծկռտուքին, որը վերագրում են ՌԴ դեսպանատանը, ասաց․
«Այս տարիների ընթացքում շատ բան եմ լսել, բայց որ ՌԴ-ն թաղապետարաններում է ինչ-որ բաներ կազմակերպում, առաջին անգամն էր։ Դժվարությամբ եմ պատկերացնում, թե դա ինչպես կարող էր տեղի ունենալ։ Ես հակադիր հարց ուղղեմ՝ իսկ նրանք փաստեր ունե՞ն, թեկուզ ինչ-որ բան, թե ինչպես ՌԴ դեսպանատունը կարող էր այդ հարգարժան թաղապետարանում իրեն ինչ-որ կերպ դրսևորել, ինչպե՞ս։ Օրինակ՝ Բայդենը, նրա ողջ թիմը, Քլինթոնը հորինել էին ռուս հաքերների պատմությունը, որոնք նրանց խանգարում էին ապրել։ Հետո պարզվեց, որ այդ ամենը ճիշտ չէ։ Ինչ-որ մեկը հորինել էր «Նովիչոկի» պատմությունը․․․ Ինչպե՞ս էր տեխնոլոգիապես հնարավոր նման բան, նրանց տեսանկյունից, ովքեր մեղադրում են Ռուսաստանին ու ՌԴ դեսպանատանը անկարգություններում կամ խնդիրներում, որոնք․․․ ինձ իսկապես հետաքրքիր է։ Ես շատ բան եմ լսել։ Թաղապետարանների մասին չէի լսել, առաջին անգամն էր, կցանկանայի հասկանալ, թե ինչպես են դա նրանք պատկերացնում։ Իրականում ինձ մոտ տպավորություն է, որ դա ներքաղաքական հարցերն արտաքին քաղաքական գործոններով լուծելու փորձ է»։
