Ապրիլի մեկից Ռուսաստանում ուժի է մտել միգրացիոն օրենսդրության վերաբերյալ փոփոխություն, ըստ որի՝ օտարերկրացիների երեխաները ՌԴ դպրոցներում սովորելու համար անպայման պետք է քննություն հանձնեն ռուսաց լեզվից։ «Հայկական Կարիտաս» կազմակերպության միգրացիոն ծրագրի փորձագետ Տաթևիկ Բեժանյանն այսօր հրավիրած ասուլիսում ասաց, որ անցողիկ շեմը չհաղթահարած երեխաներն ուղղակի չեն կարողանա սովորել դպրոցում։
«Նաև կստուգվի երեխայի ծնողների և երեխայի՝ ՌԴ-ում գտնվելու օրինականությունը։ Ես այստեղ ուզում եմ բոլոր մեր այն հայրենակիցների ուշադրությունը հրավիրել, ովքեր ՌԴ են մեկնել ընտանիքներով և որոնց երեխաներն այս պահին սովորում են դպրոցներում։ Ճիշտ է, փետրվարի 5-ից արդեն սկսել էին ստուգել՝ արդյոք երեխաներն օրինակա՞ն են գտնվում ՌԴ-ում, բայց ապրիլի մեկից սկսած խիստ ստուգումներ են լինելու ՌԴ բոլոր դպրոցներում։ Եթե երեխաների գրանցումը կեղծ է կամ գրանցման ժամկետը լրացել է, ապա պատժվելու են նաև ծնողները։ Եթե նույնիսկ ծնողն օրինական է գտնվում, ապա հնարավոր է՝ նրա օրինական գտնվելը չեղարկվի, անգամ հնարավոր է՝ ծնողների ու երեխաների արտաքսում լինի»,- ասաց Բեժանյանը։
Մանրամասն՝ տեսանյութում։
