Շարունակում ենք ներկայացնել Նիկոլ Փաշինյանի տված խոստումներն ու իրական պատկերը
27․11․2018թ․, ելույթ Ալավերդի քաղաքում, խորհրդարանական արտահերթ ընտրությունների քարոզարշավի ժամանակ
Խոստում — Ի հեճուկս նախկինում կառավարության կնքած պայմանագրերի, խմելու ջուրը ՀՀ-ում չի թանկացել, թեև այս դեկտեմբերին պետք է թանկանար, բայց մինչև 2024 թվականը չի թանկանալու:
Իրական պատկեր – Փաշինյանի այս ելույթի ժամանակ իրականում խմելու ջուրը թանկացել էր, պարզապես համաձայնություն էր կայացվել թանկացումը կիրառել 2024 թվականից։ Դրա դիմաց կառավարությունը համաձայնել էր նվազեցնել և հետաձգել «Վեոլիա ջրի» ներդրումային պարտավորությունները։
Այս խոստումից հետո Հայաստանում խմելու ջուրը երկու անգամ թանկացավ՝
2022թ․ հունվարի 1-ից՝ մոտ 20 դրամով
2023թ․ հունվարի 1-ից՝ 9 դրամով
2024 թվականի հունվարի 1-ից խմելու ջուրը կէժանանա 2,47 դրամով և կկազմի 206 դրամ։ Ստացվում է՝ Նիկոլ Փաշինյանը, որը խոստանում էր մինչև 2024 թվականը ջուրը չթանկացնել, թանկացրել է շուրջ 30 դրամով, էժանացրել՝ 2,5 դրամով։
20.07.2018թ․, Մամուլի ասուլիս
Ելույթ — Նախկինում կառավարություններ են եղել, որոնք պետական պարտք են ավելացրել թոշակ բարձրացնելու համար
Իրական պատկեր — Հայաստանի պետական պարտքը գործող կառավարությունն ավելացրել է ավելի քան 5 մլրդ դոլարով։ 2023թ․ հոկտեմբերի 1-ի դրությամբ այն կզմել է 4 տրլն 454 մլրդ դրամ կամ 11 մլրդ 322 մլն դոլար։
09․02․2021թ․ ԱԺ ամբիոնից անդրադառնալով ընդդիմադիրների՝ պարտք վերցնելու համար քննադատությանը, ԱԺ «Իմ քայլը» խմբակցության պատգամավոր Բաբկեն Թունյանն ասաց․ «Եթե ինչ-որ մեկը մեզ առաջարկում է պարտք չվերցնել, ապա պետք է ցույց տա այն ճանապարհը, թե ինչպես պետք է թոշակ ու աշխատավարձ վճարենք մարդկանց»։
Այսինքն, ի հեճուկս Նիկոլ Փաշինյանի հայտարարության, Հայաստանում կենսաթոշակն ու աշխատավարձը վճարվում է պետական պարտքի ավելացման հաշվին։
17.08.2018թ․, Ելույթ Հանրապետության հրապարակում հանրահավաքի ժամանակ
Խոստում — Կառավարությունն ինչպես ձևավորվել է այս հրապարակում, կառավարությունը սրանից հետո հաշվետու է այս հրապարակին, և սրանից հետո կառավարությունը ենթարկվում է այս հրապարակին: Մեր կյանքում առաջիկայում համատեղ ջանքերով մենք պիտի ուժեղացնենք հանրաքվեի ինստիտուտը, և բազմաթիվ որոշումներ ժողովուրդը պետք է կայացնի հանրաքվեներով: Խոսքը վերաբերում է ինչպես տեղական, այնպես էլ համապետական հանրաքվեներին, և ուրեմն առաջիկայում պետք է կատարվեն այնպիսի փոփոխություններ, որ քաղաքային, մարզային, պետական, անգամ միջազգային կարևորագույն իրադարձությունների վերաբերյալ կառավարությունը և ժողովուրդը միասին որոշում կայացնեն հանրաքվեներով:
Իրական պատկեր — Հայաստանում 2018 թվականից ի վեր տեղի չի ունեցել որևէ հանրաքվե, չնայած բազմաթիվ կարևոր իրադարձություններին։ Չի եղել որևէ որոշում, որի կատարումից առաջ հանրության կարծիքը հաշվի առնվեր։ Ավելին, ՔՊ-ականները հայտարարում են, որ ընտրություններին քվեարկելով՝ ժողովուրդը համաձայնություն է տվել ՔՊ-ի և ՔՊ-ական կառավարության որոշումներին։ Միակ դեպքը, որ պետք է հանրաքվե տեղի ունենար, վերաբերում էր սահմանադրական փոփոխություններին․ իշխանությունը ցանկանում էր Սահմանադրական դատարանի նախագահ Հրայր Թովմասյանին և ևս 6 դատավորի հեռացնել։ Հանրաքվեն պետք է տեղի ունենար 2020թ․ ապրիլի 5-ին։ Սակայն կորոնավիրուսով պայմանավորված սահմանափակումների պատճառով հանրաքվեն չեղարկվեց, դրա փոխարեն ընդամենը արվեց օրենսդրական փոփոխություն։
Համաձայն ՀՀ սահմանադրության 205-րդ հոդվածի առաջին մասի՝ «Հայաստանի Հանրապետության տարածքի փոփոխությանը վերաբերող հարցերը լուծվում են հանրաքվեների միջոցով»։ Այսպես կոչված «Խաղաղության պայմանագիրը» Հայաստանի սահմանների փոփոխության մասին է և արդեն կասկածելի է, որ չի խախտվի ՀՀ Սահմանադրությունը, և իշխանությունը կգնա հանրաքվեի։
21.05.19թ․, «Տնտեսական հեղափոխության հիմնարար ուղենիշերը Հայաստանի Հանրապետությունում» թեմայով գիտաժողով ԳԱԱ-ում
Խոստում — Կառավարությունում շատ կարևոր թեմա է ընկերությունների բաժնետոմսերի բաց վաճառքի հարցը: Եվ այո, երկու օր առաջ առաջին լուրը հայտնվեց, որ Ucom ընկերությունը նման նախաձեռնությամբ է հանդես եկել:
Իրական պատկեր — 15․11․2023թ․ Հանրային ծառայությունները կարգավորող հանձնաժողովը հրապարակեց «ՄՏՍ–Հայաստան»–ի վաճառքի մասին որոշումը։ «Վիվա Սելլ» ընկերության բաժնետոմսերի 100%–ը անցնում է կիպրական «Ֆեդիլքո Գրուպ Լիմիրիդ» ընկերությանը։ Ի հակառակ Նիկոլ Փաշինյանի խոստման, ոչ միայն տեղի չունեցավ բաժնետոմսերի բաց վաճառք, այլև Հայաստանում բջջային կապի ամենաշատ բաժանորդներ ունեցող և ռազմավարական նշանակություն ունեցող «ՄՏՍ–Հայաստան»–ի գնորդ ընկերության իրական սեփականատերերի վերաբերյալ պաշտոնական աղբյուրներում որևէ տեղեկություն չկա:
08․05․2018թ․, Ելույթ՝ Հանրապետության հրապարակում
Խոստում — Քաղաքացիներին տուգանելու, պատժելու այս խելագար մոլուցքին պետք է վերջ դնել ժամ առաջ: Նպատակը պետք է լինի ոչ թե մարդկանց տուգանելը, այլ նրանց զգոնությունը բարձրացնելը, համագործակցության և փոխըմբռնման մթնոլորտ ստեղծելը: Իսկ այն դեպքերում, երբ, այնուամենայնիվ, բանը հասնելու է տուգանքին ու տուգանելուն, դրանք ոչ միայն իրենց չափով, այլև իրենց հաճախությամբ պետք է համապատասխանեն Հայաստանում հաստատված ընդհանուր սոցիալ-տնտեսական վիճակին և ընդհանրապես տրամաբանությանը:
Իրական պատկեր – Սկսած 2020թ․ կորոնավիրուսային իրավիճակից, Հայաստանի կառավարությունը բազմաթիվ տուգանքներ սահմանեց քաղաքացիների նկատմամբ, այն շարունակվեց և ավելացվեց անգամ պատերազմի ժամանակ՝ տեղեկատվության սահմանափակման վերաբերյալ տուգանքներով, որից հետո, արդեն բազմաթիվ նոր տուգանքներ ի հայտ եկան։ Ընդ որում, շեշտենք, որ տուգանքի յուրահատուկ ձև են նաև հարկերն ու տուրքերը, որոնք ավելացել են, նոր տեսակներ են ի հայտ եկել, որոնց չվճարելու դեպքում սահմանված են դարձյալ տուգանքներ։ Բերենք մի քանի օրինակ․
- Շինթույլտվության տուրքերը թանկացել են 10 անգամ
- Այսուհետ հարկվում է բնակարանի վաձակալությունը՝ 10 տոկոսով
- Փողոցային երաժիշտները այսուհետ պետք է մինչև երեկոյան ժամը 9-ը նվագեն բնակելի և հասարակական շենքերից առնվազն 10 մետր հեռավորության վրա, իսկ այդ ժամից սկսած՝ 100 մետր հեռավորության վրա։ Կարգը խախտելու համար տուգանք է՝ մինչև 800 հազար դրամ։
- Ծխելու դեմ պայքարի շրջանակներում մեծ տուգանքներ են սահմանված բազմաթիվ վայրերում ծխելու համար
- Տուգանք է սահմանված հանրային սննդի վայրերում, ռեստորաններում աղաման դնելու համար, մինչ հաճախորդի պահանջելը։
- Անշարժ գույքի հարկի դրույքաչափերը բարձրցվել են։ Այժմ այն հաշվարկվում է ոչ թե անշարժ գույքի կադաստրային, այլ շուկայական արժեքի հիման վրա: Գույքահարկ է վճարում անգամ վթարային շենքի բնակիչը։
- Երևանի քաղաքապետարանը որոշում է ներկայացրել ավագանու հաստատմանը, որով Երևանի կենտրոնում կարմիր գծերի 12 հազար դրամ տարեկանվճարը դառնում է 160 հազար դրամ, իսկ վարչական շրջաններում 0 դրամը դառնում է 24 հազար դրամ։ Նշվում է թե խնդիրը կենտրոնում բեռնաթափելն է, բայց այդ դեպքում անհասկանալի է, թե ինչու է մյուս վարչական շրջաններում մտցվում վճար։
- Կրկնակի տուգանքի համակարգ է ներդրվել․ եթե նախկինում վարորդները տուգանվում էին երթևեկության խախտումների համար, այժմ և՛ տուգանվում են, և՛ զրկվում են բալերից
- Երևանում փողոցային առևտրի համար սահմանված է տուգանք՝ գույքի խլումով
- Ոստիկանությունը բջջային հավելված է թողարկել՝ քաղաքացիներին կոչ անելով նկարել իրենց հանդիպած դեպքերը, որոնք կհամարեն խախտում և ուղարկել ոստիկանությանը՝ տուգանելու համար
- Ընդհանուր օգտագործման ճանապարհների օգտվելու կարգի խախտման համար տուգանքը մեծացել է
- Տուգանք է սահմանված ձմերուկը կտրտած վաճառելու համար
- Մաքսային հսկողության գոտում կարգի խախտման տուգանք է նշանակվել 200 հազար դրամ
- 11․12․2023թ․ խորհրդարանը քննարկեց «Պետական տուրքի մասին օրենքում» լրացումը, որով առաջարկվում է բարձրացնել մաքսատանը մեքենայի կայանման դրույքաչափը՝ օրական 1600 դրամի փոխարեն սահմանելով 5000 դրամ։
- Միկրոբիզնեսը 1 աշխատողի համար այլևս վճարում է 20 տոկոս եկամտահարկ՝ ի տարբերություն նախկինում 5000 դրամի։
Նշենք, որ պետական բյուջեում նախատեսված՝ իրավախախտումների համար պատժամիջոցներից 2023 թվականի մուտքերը կառավարությունը գերակատարել է դեռ օգոստոս ամսին։
Այս ամենին հավելենք 06․11․2022թ․ միջադեպը, երբ Երևանի Պռոշյան-Դեմիրճյան փողոցների խաչմերուկում՝ կառավարական առանձնատների մոտ, որտեղ բնակվում է Նիկոլ Փաշինյանը, քաղաքացին ինքնահրկիզվել էր։ Շրջակայքը հսկող ոստիկանները մարել էին կրակը, նրան հոսպիտալացրել։ Վիճակը գնահատվում էր ծայրահեղ ծանր։ Կառավարական առանձնատների մոտ ինքնահրկիզում կատարած քաղաքացին 47-ամյա Ազիզ Ուսոյանն էր, որի եղբայրը հայտնել էր ինքնահրկիզման պատճառը․ նրա եկամտի աղբյուրը երկաթյա և պլաստմասե իրերի հավաքում-հանձնումն էր։ ԴԱՀԿ-ն, սակայն, 10 հազար դրամի տուգանքի պատճառով մեքենան խլել էր տղամարդուց: Հուսահատ տղամարդը դիմել էր այդ քայլին՝ ինքնահրկիզումից առաջ մեղադրելով Նիկոլ Փաշինյանին։
06.10.2021թ․, Ելույթ ԱԺ-ում
Խոստում — Հայաստանում նոր ատոմակայան կկառուցվի, բանակցություններն արդեն սկսվել են
Իրական պատկեր — Հայաստանում ատոմակայանի կառուցումը խոսակցություններից այն կողմ չի անցել։
Շարունակելի
