Բորիս Մուրազին ֆեյսբուքյան իր էջում գրում է․
Երկրորդ նախագահ Ռոբերտ Քոչարյանի ասուլիսից հետո երրորդ նախագահ Սերժ Սարգսյանի թիմակիցները մեծ անհանգստություն ապրեցին ու դա հրապարակային դրսևորվեց։ Քննարկումները ի վերջո հասան 2018 թվականի իրադարձություններին, որի մասին ես տասնյակ վերլուծություններ ունեմ ու բոլորն էլ փաստարկված։ Երկրորդ նախագահը մշտապես բաց է եղել ու հնարավոր բոլոր թեմաների վերաբերյալ պատասխանել է լրագրողների հարցերին՝ իր կառավարման տարիների ձեռքբերումներից մինչև հոկտեմբերի 27-ի այդքան մանիպուլացված թեման։ Պատերազմից հետո՝ ընդհանրապես, Քոչարյանը դարձել էր միակ նախագահը, որ ասուլիսներ էր տալիս։
Հիմա, քանի որ թեման հասել է 2018-ի դեպքերին, որի գլխավոր դերակատարը եղել է երրորդ նախագահը, ես հուսամ, որ նա կհետևի երկրորդ նախագահ Ռոբերտ Քոչարյանի օրինակին ու այդ թեմայով ասուլիս կտա։ Կրկնում եմ ասուլիս, ոչ թե իրեն լոյալ լրագրողի կամ լրագրողների հետ համախոհների զրույց։
Ասուլիսի ակնկալիք ունեմ հատկապես այն պատճառով, որ ես էլ մի քանի հարց ունեմ, և որ երրորդ նախագահը խոստացել է նման ասուլիս դեռ հեռավոր 2020 թվականին։ Իսկ ես հավատում եմ, որ նախագահ Սերժ Սարգսյանը կկատարի իր խոստումը, հո՞ հետ չի կանգնի իր խոսքից։
Կարծում եմ ասուլիս պետք է պահանջեն նաև նախագահ Սերժ Սարգսյանի իրական կողմնակիցները։ Ի վերջո այդ մարդիկ ասում են, որ բոլոր հարցերի պատասխանները կան։ Դե բա հրաշալի առիթ է՝ համ խոստումը կկատարվի, համ էլ բոլոր հարցերը պատասխաններ կստանան։ Սպասում ենք։
