Նոր Հայաստան, նոր բյուջե էինք ակնկալում, բայց ունենք այն, ինչ ունենք. Սերգեյ Բագրատյան

Հանրության սպասելիքները 2019 թվականի բյուջեից մի քիչ այլ էին. նոր Հայաստան, նոր բյուջե էին ակնկալում: Այս մասին բյուջեի նախագծի քննարկման ժամանակ ասաց ԱԺ «Ծառուկյան» դաշինք խմբակցության պատգամավոր Սերգեյ Բագրատյանը:

«Ինչևէ, այս պահին մենք ունենք այն, ինչ ունենք, այսինքն՝ այս պահին մենք ունենք իներցիոն բյուջե: Ես այսպես ձևակերպեմ՝ իներցիոն, կհամաձայնեք, թե ոչ, կնշեք ձեր պատասխանում: Ինձ ավելի շատ հետաքրքրում է, թե արդյոք դուք մտածում եք բյուջեի ծախսային մասը նորովի քննելու, նոր բանաձևով հաշվարկելու մեխանիզմը, կա՞ ծախսերի չափելիության խնդիրը: Եթե, օրինակ, մենք ուզում ենք ՏՏ ոլորտը զարգացել, չպետք է իներցիոն նույն գումարը տրամադրենք, որքան այս տարվա բյուջեում է, պետք է համարձակ ձևով տեղաշարժ անենք»,-ասաց Բագրատյանը:

Ատոմ Ջանջուղազյանն ասաց, որ հանրային սպասումները պետք է լինեն տարբեր, այլապես երբևէ չի լինում քննադատություն: Ինչ վերաբերում է բյուջեի իներցիոն լինելուն, նա ասաց, որ նախագիծը ներկայացնելիս հայտնել է, թե բյուջեն ինչ տրամաբանության մեջ է:

«Հիմա մենք ունենք այնպիսի իրավիճակ, ինչպիսին ունենք: Եթե միայն օրենքներով է սահմանված, թե որքան ծախս պետք է անենք, որը մեր ընդհանուր հնարավորության 70 %-ն է, միջազգային պարտավորությունների համաձայն, սահմանված է, որ մեր հնարավորության 11 %-ը պետք է ծախսենք: Կառավարության որոշումներով, որոնք բխում են օրենքներից, սահմանված է, որ 9-10 %-ը պետք է ծախսենք, և միայն 10 %-ը մնացել է հայեցողականության համար»,-ասաց Ջանջուղազյանը:

Նրա խոսքով՝ բյուջեի առանձնահատկությունն այն է, որ հերթական փուլն է թևակոխել այս գործընթացը, որտեղ գնահատվում են ոչ թե գործընթացները, ոչ թե ծախսվող ֆինանսական ռեսուրսները, այլ արդյունքները, որոնք այդ ֆինանսական ռեսուրսներով ակնկալվում է արձանագրել: