15 09 2018

Պատգամավոր Փաշինյանը պայքարում էր տեսախցիկների դեմ, վարչապետ Փաշինյանը՝ ավելացնում

Պատգամավոր Փաշինյանը պայքարում էր տեսախցիկների դեմ, վարչապետ Փաշինյանը՝ ավելացնում

ՀՀ ԱԺ պատգամավոր եղած ողջ ընթացքում Նիկոլ Փաշինյանը բուռն պայքար էր մղում ճանապարահային արագաչափերի և տեսախցիկների, կարմիր գծերի դեմ: Իսկ հեղափոխության քայլերթի ժամանակ անգամ պիտակներ էր փակցնում տեսացխիկների վրա:

Վարչապետի պաշտոնում, արդեն, կառավարության երեք նիստի ժամանակ Նիկոլ Փաշինյանն անդրադարձավ խնդրին՝ ասելով, թե պետք է դիտարկել տուգանքի ռեժիմն ու ընդհանրապես տեսախցիկների գործունեության դադարեցումը:

Ոչ դրանց գործունեությունը դադարեցվեց, ոչ տուգանքի ռեժիմը փոխվեց: Ավելին, կենացները քաղցրացան, ու հիմա էլ խոսվում է նոր տեսախցիկներ բերելու մասին՝ 2000 հատ:

Ոստիկանապետ Վալերի Օսիպյանը «Հայկական Ժամանակ»-ին սեպտեմբերի 7-ին ասել էր բառացի հետևյալը. «Սա արվում է վարորդներին զսպելու նպատակով, քանի որ վրաերթերի, ՃՏՊ-ների, վիրավորների թիվը շատ է»: 

Ուշագրավ է այն, որ սրանից 7 օր անց՝ սեպտեմբերի 14-ին, ոստիկանությունը հանդես եկավ հայտարարությամբ, թե. «Ուրախալի է, որ ճանապարհային ոստիկանությունն ունի հասարակության աջակցությունը. հանրային կարծիքը հավանություն է տալիս այս գործողություններին, իսկ քաղաքացիները հաճախ այս կամ այն կերպ օժանդակում են ոստիկաններին, որ լիարժեք իրականացնեն իրենց գործառույթները:

Ու կարծես նորից իրավիճակը փոխվում է: Մասնավորապես, սեպտեմբերի 1-ից 12-ն ընկած ժամանակահատվածում հանրապետության տարածքում գրանցվել է 136 ճանապարհատրանսպորտային պատահար` անցյալ տարվա նույն շրջանում գրանցված 143-ից 7-ով պակաս: Նվազել է նաև զոհերի ու վիրավորների թիվը, համապատասխանաբար` 6-ով ու 12-ով. անցյալ տարվա այս հատվածում ճանապարհներին զոհվել է 15 մարդ, այս տարի` 9-ը, վիրավորվել է 193-ը, այս տարի` 181 մարդ»: 

Ստացվում է՝

Ոստիկանապետն իրավիճակին չի տիրապետում, քանի որ իր և ոստիկանության տվյալները բոլորովին հակասում են Նոր տեսախցիկներ բերելու անհրաժեշտություն չկա Իրավիճակին տիրապետում են թե ոստիկանությունը, թե ոստիկանապետը, բայց միաժամանակ՝ նոր բիզնես է հիմնադրվում:

Բանն այն է, որ նախկինում տեսախցիկները բերում էր «Էլիպս» ընկերությունը, «Սեքյուրիթի դրիմ»-ն էլ տեղադրում էր ու վերահսկում: Հունիսի 21-ին այս ընկերություններում հատուկ գործողություններից հետո ոստիկանությունը հայտարարեց 1 միլիարդ 16 մլն դրամ հափշտակության մասին: Ընկերություններում երկու անգամ եղան ստուգումներ, առգրավվեցին փաստաթղթեր: Իսկ ընկերության ղեկավար Ալեքսան Զաքարյանը բազմիցս հայտարարեց, թե  որևէ բան չեն հայտնաբերվել, մեղադրանքներն անհիմն են: Արդեն անցել է 2.5 ամիս, բայց որևէ բացահայտում չի եղել, մեղադրանք չի առաջադրվել: Պարզապես ոստիկանությունը շտապել է հայտարարություն անելիս՝ դրանով արատավորելով ընկերությունների անունն ու ֆինանսական վնաս հասցնելով:

Ըստ ամենայնի, ընկերության դեմ սկսվեցին իրավական արշավներ՝ չեզոքացնելու համար: Ոստիկանությունն արդեն հաստատել է, որ կոնկրետ ընկերություն կոնկրետ հայտ է ներկայացրել տեսախցիկներ բերելու: Տրամաբանական է, որ այդ ընկերությունները չեն լինի «Էլիպս»-ն ու «Սեքյուրիթի դրիմ»-ը:

Այս ընկերությունների տնօրեն Ալեքսան Զաքարյանը Yerevan.Today-ի հետ զրույցում ասաց, որ իրենք չեն դիմել ոստիկանություն տեսախցիկներ տեղադրելու համար: «Թե ովքեր են դիմել, մենք չգիտենք, լսել ենք լրատվության միջոցներով: Նույնիսկ դեռ պարզ չէ, թե այդ տեսախցիկները ինչի համար են դրվում, ինչ խնդիր են լուծելու»:

Ինչ վերաբերում է շուկա մեկ այլ ընկերության մուտքին, ասաց. «Երթևեկությունը հսկող տեսախցիկների մասով միայն մեզ հետ է պայմանագիր կնքված, բայց վաղը կարող է ուրիշի հետ էլ լինել: Պայմանագրով որևէ կետ չկա, որ միայն մենք պետք է լինենք»:

Ամենայն հավանականությամբ, կբերվի նոր խաղացող և նրան կտրամադրվի այդ եկամտաբեր աշխատանքը կատարելու իրավասությունը: Ինչ-որ նոր բիզնես է ծաղկում, որի «հրամանատարությանը» կարելի է փնտրել իշխանական կուլիսներում, որը շուտով կպարզվի:

Ահարոն Համբարձումյան

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ