«Ես էդ տեսակը չեմ, վախեցողներից չեմ։ Ինչ ուզում է՝ անեն, ոնց ուզում է՝ անեն, ամեն տեղ էլ տղամարդու տեղ է։ Գնում ենք առաջ, իմ հայրենիքի համար ամեն ինչի էլ պատրաստ եմ»,- այս մասին այսօր՝ սեպտեմբերի 16–ին, Հակակոռուպցիոն ատարանի մոտ լրագրողների հետ զրույցում նշեց Գյումրու քաղաքապետ Վարդան Ղուկասյանը՝ պատասխանելով հարցին՝ հնարավո՞ր է, որ ճնշումների տակ հրաժարվի քաղաքապետի պաշտոնից։
«Այսօր երկիրը տանում են թուրքացման։ Այսօր հարցը դրել ենք, կամ էստեղ պետք է լինի ռուսը, կամ թուրքը։ Հիմա բոլորդ կողմնորոշվեք՝ կամ թուրքի կողմն եք, կամ ռուսի հետ պետք է գնաք։ Այս ամեն ինչը տեսնելով, մենք էս երկուսի մեջ ընտրությունը պետք է քննարկման առարկա սարքե՞նք»,- ասաց նա։
Անդրադառնալով իր դեմ հարուցված քրեական գործին, նա նշեց. «Ինձ դատարան են բերել լոկ նրա համար, որ ես մարդկանց հողատարածքներ եմ տվել, որ մարդիկ բնակարաններ, կենցաղսպասարկման օբյեկտներ կառուցեն։ Երկրաշարժ տեսած քաղաքապետը եթե նման գործելաոճ չի որդեգրում, ուրեմն պետք է վռնդել քաղաքապետարանից։ Քաղաքի հատակագիծը փոփոխական է։ Եթե դրա մասին եք ասում, ապա կասեմ, որ ես մեղավոր եմ, որ մարդկանց թողել եմ բնակարաններ կառուցել 90 տոկոս փլված քաղաքում։ Ես զարմանում եմ, որ դրանում կարելի է քաղաքապետին մեղադրել»։
Անդրադառնալով որդու գործին` Ղուկասյանն ասաց, որ երբ որդին գնացել է Սրբազանի դատին, ինքն ասել է՝ անպայման կկալանավորեն:
«Դատարանից հույս չկա, բայց ես միանշանակ հավատում եմ Աստծո դատաստանին: Ես մի բան գիտեմ՝ յուրաքանչյուր դատավոր, յուրաքանչյուր դատաիրավական ոլորտի ներկայացուցիչ, եթե իրենց հանձնարարական են տալիս, իրենք պետք է ասեն՝ սա անելու բան չէ, ոնց անենք: Կփոխվի այդ ամեն ինչը, հետո ձեր աշխատավարձի համար մարդկանց տները քանդում եք, դուք Աստծուց չե՞ք վախենում: Օրենքը պահե՛ք, ճշմարտությամբ առաջնորդվե՛ք»,- նշեց նա:
