«Ուժեղ Հայաստան» կուսակցության ներկայացուցիչները երեկ այցելել են Տիգրանաշեն։ Խմբակցության ղեկավար Նարեկ Կարապետյանը տեսանյութ է տարածել, որտեղ ասում է․ «Սիրելի՛ հայրենակիցներ, մենք Տիգրանաշենում ենք։ Այս ճանապարհը Հայաստանի՝ Իրանի հետ կապող ռազմավարական ճանապարհն է, որով տարեկան, ասում են, 100 հազարավոր բեռնատար մեքենաներ են անցնում։ 2 միլիոն տոննա ապրանք է այս ճանապարհով անցնում, և սա կապում է Սյունիքը, Վայոց ձորը, Բյուսիսային Հայաստանի հետ։
Մեզ շատ են հարցնում, ասում են՝ ինչպե՞ս ենք մենք տեսնում, թե ինչ գործիքակազմով է Ադրբեջանը ցանկանալու ադրբեջանցի բերել Հայաստան։ Մի քանի շաբաթ առաջ Հայաստանի վարչապետը հենց այս տարածքի մասին ասաց՝ Քերքի, Տիգրանաշենի մասին։
Դրան կհետևի նաև այն, որ նա ցանկանալու է այս տարածքը, որը Հայաստանի ամենակարևոր ռազմավարական ճանապարհն է, հանձնել Ադրբեջանին։ Գյուղի տեղը ադրբեջանցիները նավթադոլարներով ծրագրեր ունեն կառուցելու այստեղ ավան՝ քաղաքից մեկ կիլոմետրի վրա, և ինչպիսի՞ն է այլևս լինելու այս տարածքը՝ ադրբեջանցիներով բնակեցված։
Հեռվում դուք տեսնում եք Արարատը, հեռվում Երևանն է՝ Երևանի մի քանի տասնյակ րոպեների հեռավորության վրա։
Մենք պետք է պայքարենք ու պահենք մեր հայրենիքը։ ՔՊ-ն հանձնում է տարածքները, մենք առաջարկում ենք զարգացնել տարածքները, ստեղծել լոգիստիկ և տուրիստական հետաքրքիր տարածաշրջանային կենտրոն»։
