ՀՀ ՆԳՆ կիբեռոստիկանությունը հորդորում է խուսափել Տելեգրամ հավելվածում տարածում գտած «Վերիֆիկացիա», «Նույնականացում» և այլ նման անվանումներով ալիքներում ու խմբերում գումար վաստակելու առաջարկներից։
«Անհայտ օգտատերերը գումարի դիմաց առաջարկում են ձեր անունով նույնականացնել էլեկտրոնային փոստեր (Gmail, Mail.ru, Yandex և այլն), առցանց բանկային հաշիվներ, խաղային հաշիվներ (Vbet, Adjarabet և այլն) և էլեկտրոնային դրամապանակներ (TelCell, EasyPay, Idram և այլն)։
Արդյունքում՝ այդ օգտատերերը, ներգրավված լինելով տարբեր հանցավոր սխեմաներում, ձեր կենսաչափական տվյալներով գրանցված հաշիվները հետագայում օգտագործում են այլ անձանցից գումար հափշտակելու, իսկ որոշ դեպքերում նաև ձեր անվամբ առցանց վարկ ձևակերպելու նպատակով, ինչի արդյունքում կարող են առաջանալ ոչ միայն վարկային պարտավորություններ, այլ նաև քրեական պատասխանատվություն ձեր նկատմամբ»,- նշված է հաղորդագրության մեջ։
