Քաղաքագետ Արա Պողոսյանի ֆեյսբուքյան գրառումը. «Ադրբեջանը հետևողականորեն մեծացնում է իր հարվածային ուժը։ Շեշտում եմ` ո՛չ պաշտպանական կարողությունները, այլ հարձակողական։ Հարվածային ուժի շեշտակի աճը ո՛չ միայն նպատակ ունի անշրջելի դարձնել տարածաշրջանում ձևավորված նոր ստատուս քվոն, այլև նպատակ ունի անշրջելի դարձնել տարածաշրջանի ռազմա-քաղաքական հավասարակշռության էական խախտումը հօգուտ Ադրբեջանի։
Սա հնարավորություն է տալիս Ադրբեջանին ո՛չ միայն դառնալու տարածաշրջանային թիվ մեկ դերակատարը, այլև «խաղաղություն ուժեղի պայմաններով» հայեցակարգը, որի մասին մեկ անգամ չէ, որ խոսվել է Ադրբեջանի նախագահի ու այլ պաշտոնյաների կողմից։
Վրաստանը, որպես նոր կոնֆիգուրացիայի մաս, ևս անմասն չէ, սակայն Վրաստանը ո՛չ միայն պատրաստ չէ, այլև տնտեսական և այլ փոխկապակցվածությունների պատճառով, ինչպես նաև ռազմա-քաղաքական համեմատաբար թույլ վիճակի պատճառով չի կարող լինել մրցակից մի կողմից, իսկ մյուս կողմից Հայաստանի հետ չի կարող առայժմ տանդեմ կազմել, հաշվի առնելով Հայաստանի ներկայիս առաջնահերթությունները և Ադրբեջանի ու Թուրքիայի պայմաններով խաղաղության հասնելու ձգտումները։
Ի՞նչ է մնում Հայաստանին անել։ Այստեղ կա երկու սցենար.
1. Փորձել ասիմետրիկ քայլերով զարգացնել պաշտպանական և հարձակողական կարողությունները, բարձր տեխնոլոգիաները ինտեգրելով բանակին, ստանալ տեխնոլոգիական բանակ, դիվանագիտական հավասարակշռություն հաստատել տարածաշրջանում, կազմելով քաղաքական և ռազմական համագործակցությունների ցանցեր (Հունաստան, Կիպրոս, Իրան, Հնդկաստան, Եթովպիա, Ֆրանսիա, Վրաստան և այլն) և մոտենալ տարածաշրջանային ռազմա-քաղաքական հավասարակշռության հաստատմանը, որը առաջ կբերի «խաղաղություն արդարության և հավասարության սկզբունքով» բանաձևը։
2. Հարմարվել ստեղծված իրավիճակին և տարածաշրջանային դերակատարից դառնալ տարածաշրջանային տարանցիկ գոտի, առանց ինքնիշխանության էական հնարավորությունների։
«Խաղաղություն ուժեղի պայմաններով» բանաձևը հենց թույլի ինքնիշխանության հաշվին է ձևավորվում և գործադրվում։ Մնացածը միայն նարատիվային հակադարձումների մակարդակում է։
Ուզու՞մ ես իրական խաղաղություն, ուրեմն պիտի հաստատես հավասարակշռություն, մնացածը հեքիաթներ են մանկական մտածողություն ունեցող մարդկանց համար»:
