Վրաստանի խորհրդարանը դատապարտել է «Մեգոբարի ակտը»՝ ԱՄՆ Կոնգրեսի Ներկայացուցիչների պալատի կողմից աջակցվող օրինագիծը, որը պատժամիջոցներ է նախատեսում Վրաստանի իշխանությունների դեմ։
Վրացի պատգամավորների կողմից ընդունված հայտարարության մեջ ասվում է, որ փաստաթուղթը հիմնված է Թբիլիսիի դեմ ուղղված «երեք կեղծ մեղադրանքների վրա»:
Վրացի օրենսդիրները հերքում են այն պնդումները, թե երկիրը հետ է նահանջում ժողովրդավարությունից, արգելափակում է եվրաատլանտյան ինտեգրումը և մերձենում Մոսկվային և Պեկինին: Նրանք ընդգծում են, որ Վրաստանում անցկացվում են ազատ և արդար ընտրություններ, և որ 2008 թվականից Ռուսաստանի հետ դիվանագիտական հարաբերություններ չկան։
«Վրաստանի և Չինաստանի միջև քաղաքական հարաբերությունները գտնվում են նույն մակարդակի վրա, ինչ ԱՄՆ-ի և Չինաստանի հարաբերությունները»,- ասվում է հայտարարության մեջ։ Վրացի պատգամավորները նշել են, որ 2012 թվականից հետո ոչ մի վրացի քաղաքական գործիչ չի այցելել Մոսկվա։
Հիշեցնենք, որ Մեգոբարիի ակտն ընդունվել է ԱՄՆ Ներկայացուցիչների պալատի կողմից մայիսի 5-ին և այժմ ուղարկվել է Սենատ՝ քննարկման համար: Հաստատվելու դեպքում այն կուղարկվի նախագահ Դոնալդ Թրամփին՝ ստորագրության համար։
Օրինագծի հեղինակը հանրապետական կոնգրեսական Ջո Ուիլսոնն է, ով աջակցում է վրացական ընդդիմությանը։ Ակտի անվանումը առաջացել է վրացերեն «megobari» բառից, որը նշանակում է «ընկեր»։
Փաստաթուղթը ներառում է դրույթներ վրացական ղեկավարության դեմ հնարավոր պատժամիջոցների մասին՝ «ժողովրդավարությունը հետին պլան մղելու», Ռուսաստանի, Չինաստանի և Իրանի հետ մերձեցման համար։ Այնուամենայնիվ, այն նաև աջակցություն է խոստանում Վրաստանին, եթե երկիրը վերադառնա ժողովրդավարության ուղի և ճշգրտի իր արտաքին քաղաքականությունը։
