Վահան սարկավագ Ավագյանն իր որդիական խոնարհումն է հայտնել Գարեգին Բ կաթողիկոսին։

«Սիրելի՛ հոգևոր հայրեր և եղբայրներ, հայ ժողովրդի հավատավոր զավակներ, սիրելի՛ ինձ ծանոթ և ոչ ծանոթ եկեղեցասեր և ազգասեր հայորդիներ, սրտի ցավով ենք հետևում եկեղեցու սրտում բույն դնող պառակտողական երևույթներին։ Ինձ համար եկեղեցու` պատմության մեջ արձանագրված բոլոր պառակտումները միշտ սրտի կսկիծ են առաջացրել, որովհետև մեր Տեր Հիսուս Քրիստոսի հիմնած եկեղեցու կարևոր բաղադրիչներից մեկը միասնականությունն է, իսկ մենք` որպես Քրիստոսի զինվորներ` զինված աստվածային սիրով, պարտավոր ենք ամուր պահել այդ միասնության խորհուրդը, անկախ տարաձայնությունների և այլևայլ միջանձնային հակառակությունների։

Սիրելինե՛ր, իմ հորդորն է` մի պահ կանգ առնենք և մտածենք ավելի սթափ ու չգործենք ո՛չ զգացմունքային ոգևորությունից, ո՛չ էլ որևէ այլ էմոցիոնալ պոռթկման պատճառով։ Եթե կարծում ենք որևէ բարենորոգման կարիք կա, ինչու՞ չենք սկսում գործել, ինչու՞ չենք բարեփոխվում ու չենք բարեփոխում մեր շրջապատը, և արդյոք ինչո՞վ են խանգարում մեզ Վեհափառ հայրապետի անձնական մեղքերը կամ նրա` մեր պատկերացումներին համապատասխան չլինելը։ Արդյոք Քրիստոս բարեփոխումների համար փոխե՞ց որևէ իշխանություն` իհարկե ո՛չ։ Որևէ իշխանություն կարող չեղավ հաղթել Քրիստոսի Ավետարանին։ Ու հիմա մենք, եթե կարծում ենք` արդարացի ենք, ապա ի՞նչ կարիք ունենք ուժով գործելու, ի՞նչ կարիք ունենք մեր արդարությունը պարտադրելու վանքեր ու եկեղեցիներ գրավելու և ատելություն քարոզելու գնով։ Չէ ո՞ր չարիք ու ատելություն սերմանելով բարին չես հնձի։

Ու, ի վերջո, եթե մենք մեր եկեղեցու ներքո ունեցած խնդիրները պայմանավորում ենք Վեհափառի անձով, ապա մոռանում ենք, որ եկեղեցու գլուխը Քրիստոսն է, Ով, անպայման, մեր` դեպի Աստված քայլելու պարագայում, անկախ կաթողիկոսի անձից, մեզ կզորացնի ու կպարգևի բոլորիս կողմից այդքան բաղձալի նորոգումը։ Ու կուզեմ, որ Քրիստոսի Անվանակոչության օրը դառնա մեր մեջ բարին ու չարը ճիշտ անուններով կոչելու և թացը չորից զանազանելու օր։

Որդիական խոնարհումս ազգիս հայրապետին` Գարեգին Բ կաթողիկոսին։ Աստված զորավիգ և պահապան Հայ Առաքելական Սուրբ եկեղեցուս և հայ ազգիս»,- նշել է Վահան սարկավագ Ավագյանը։