Մահացել է հայկական ֆուտբոլի լեգենդար թիմի` «Արարատ-73»-ի  ֆուտբոլիստ Սերգեյ Պողոսյանը:

Սերգեյ Պողոսյանը ծնվել է 1948 թվականին: ԽՍՀՄ ֆուտբոլի առաջնության բարձրագույն լիգայում հանդես է եկել 1968-1969 թվականներին Սանկտ-Պետերբուրգի «Զենիթ»-ում, 1970 թվականից Երևանի «Արարատ»-ի կազմում: 1973 թվականին ԽՍՀՄ գավաթակիր և երկրի առաջնության ոսկե մեդալակիր է: Պարգևատրվել է ԽՍՀՄ Գերագույն խորհրդի պատվոգրով: «Արարատ»-ի կազմում մասնակցել է 63 խաղի, խփել՝ 5 գոլ:

1973 թվականին «Արարատ»-ը մեկ խաղաշրջանում նվաճել է Խորհրդային Միության գավաթն ու նաև արժանացել Խորհրդային Միության չեմպիոնի տիտղոսին:

Սերգեյ Պողոսյանի հոգեհանգիստը տեղի կունենա վաղը՝ սեպտեմբերի 16-ին, Կոնդի Սուրբ Հովհաննես եկեղեցում, հուղարկավորությունը՝ սեպտեմբերի 17-ին՝ ժամը 13։00-ին՝ նույն վայրից։