Իրավապահներն առայժմ չեն հստակեցնում՝ Նիկոլ Փաշինյանի հասցեին սպառնալիքներ հնչեցնելու վերաբերյալ դիմակավոված անձանց առեղծվածային տեսանյութի գործով հետախուզվողներ կան, թե ոչ, թեև Նիկոլ Փաշինյանը հայտարարել էր, թե իբրև հայտնի է անձանց շրջանակը, նրանք 2024թ․-ից Հայաստանում չեն գտնվում։ Գրում է «Փաստինֆո»-ն։
Ստացվում է Նիկոլ Փաշինյանին զեկուցում են,այսպես կոչված, անկաք քննչական մարմնի վարույթում կատարվող քննության արդյունքները, եթե չասենք, որ նրա ուղղորդմամբ է տեղի ունենում քննությունը։
Նշենք, որ տեսանյութի գոյության մասին շատերը իմացել են Նիկոլ Փաշինյանի ուղիղ եթերից,որի միջոցով արցախցիների նկատմամբ ատելություն գեներացվեց։ Այնուհետեւ
ՀՀ քննչական կոմիտեն հայտնեց, թե վարչապետ Նիկոլ Փաշինյանի հասցեին սպառնալիքներ և հայհոյանքներ պարունակող տեսանյութի առնչությամբ նախաձեռնվել է քրեական վարույթ։
Քննչական կոմիտեի հաղորդմամբ՝ մի խումբ անձանց կողմից սպանության նախապատրաստության, համակարգչային սաբոտաժ կատարելու և հրազենի ու ռազմամթերքի ապօրինի շրջանառության դեպքերի առթիվ իրականացվում է նախաքննություն։
Համացանցում մայիսի 18-ին տարածված տեսանյութում մի խումբ դիմակավորված և զինված անձինք սպառնալիքներ ու հայհոյանքներ էին հնչեցրել վարչապետի հասցեին։
այսօր տեղի ունեցած ասուլիսում Նիկոլ Փաշինյանը հայտարարել է, որ իր հասցեին սպառնալիքներ հնչեցրած դիմակավորված անձանց ինքնությունները, ըստ օպերատիվ տվյալների, մոտավորապես պարզված են. նրանք 2024 թվականից Հայաստանում չեն գտնվում։
«Ես կարծում եմ, որ անձանց շրջանակը մենք պարզել ենք, մոտավոր։ Ըստ էության, այն անձինք, որոնք մենք կարծում ենք, որ այդ տեսանյութում են, 2024 թվականից Հայաստանում չեն։ Սա օպերատիվ տեղեկություն է, բայց ապացույց չունենք։ Մենք անուն-ազգանուններ ունենք, և նրանց հայտնաբերման ուղղությամբ ջանքեր են գործադրվել, հենց այդ ժամանակ էլ պարզվել է, որ նրանք Հայաստանում չեն։ Նախկինում, մեծ հավանականությամբ, այլ գործերով մեր հետաքրքրություն տիրույթում են եղել։ Մասնավորապես, հնարավոր է ապօրինի վարձկանության տրամաբանության մեջ գտնվող անձինք լինեն։ Բայց սա ընդամենը օպերատիվ տեղեկություն է»,-ասել է Փաշինյանը։
Թե ինչու է օպերատիվ տվյալները հանրայնացվում կամ առհասարակ ինչպես է ստացվել, որ 2024 թվականից Հայաստանից դուրս գտնվող անձինք որոշել են հիմա նման տեսանյութ տարածել՝ առեղծված է, բայց առավել ուշագրավ է, որ մինչ Նիկոլ Փաշինյանը հրապարակում է օպերատիվ տվյալներ՝ ՔԿ-ից զերծ են մնում մեկնաբանությունից։ «Փաստինֆո»-ի բանավոր հարցին ՔԿ-ից չպատասխանեցին, գրավոր հարցում պահանջեցին, դատախազությունից դեռևս արձագանք չկա։
