Պաշտպանության նախարարի հրաժարականի հանրային պահանջ կա, քաղաքական որոշում է պետք։ Այս մասին, այսօր՝ սեպտեմբերի 1–ին, Հակակոռուպցիոն դատարանի մոտ լրագրողների հետ զրույցում հայտարարեց ՀՀ պաշտպանության նախկին նախարար Դավիթ Տոնոյանը՝ խոսելով բանակում ինքնասպանությունների ու սպանությունների մասին։ Հայտնում է news.am-ը։
«Ժամանակին այդպիսի դեպքերից հետո եղել են պաշտոնանկություններ, ռազմական ոստիկանության պետն է պաշտոնանկ եղել 2019–ի, թե 2020 թվականի սկզբին, բոլոր ոստիկանապետները տեղային, որոնք սպասարկում էին այս կամ այն զորամասը, պաշտոնանկություններ լինում էին։
Իսկ բանակում ինքնասպանությունների պարագայում գտնում եմ, որ պետք է մի քիչ ավելի զգույշ լինել և ավելի շատ աշխատել, այլ ոչ թե պաշտոնանկությունների միջոցով լուծումներ տալ»,- ասաց նա։
Հարցին՝ իրավաչափ է համարո՞ւմ, որ այդ դեպքերի հետևանքով հենց նախարարը պիտի հրաժարական տա, Տոնոյանը պատասխանեց․ «Նախարարի հրաժարականը վարչապետի ու նախարարի դաշտում է գտնվում։ Եթե իրենք գտնում են, որ քաղաքական առումով դրա անհրաժեշտությունը կա՝ որոշումը կկայացնեն, ուրեմն չեն տեսնում քաղաքական այդպիսի որոշում։ Հանրային պահանջը կա, բայց հանրային պահանջն էլ այնպես չէ, որ պետք է համեմատական անել այլոց աշխատանքի հետ, այլոց վիճակագրության հետ: Իմ պաշտոնավարման ժամանակ երևի մի երեք անգամ հանրային դաշտում անընդհատ պաշտոնանկ եմ եղել, ցույցեր են եղել, ամեն ինչ եղել է, դա քաղաքական որոշման խնդիր է»,- նշել է նախկին նախարարը։
