Ռուսաստանի արտաքին գործերի նախարարությունը կանչել է Մոլդովայի դեսպան Լիլիան Դարիիին: Նրան ներկայացվել է բողոքի նոտա՝ 1961 թվականի Վիեննայի դիվանագիտական հարաբերությունների մասին կոնվենցիայի դրույթները խախտելու համար:
Բողոքի պատճառը Քիշնևի օդանավակայանում ռուս դիվանագիտական սուրհանդակների ձերբակալումն է եղել։ Նրանց ձերբակալման մասին հաղորդվել է երեկ: Մոլդովայում Ռուսաստանի դեսպանատան տվյալներով՝ օդանավակայանի անվտանգության ուժերը «անօրինական պահանջ» են ներկայացրել՝ խուզարկելու դիվանագիտական նամակագրությունը, նաև խնդրել են դիվանագետներին հանձնել իրենց բջջային հեռախոսները: Մոլդովայում Ռուսաստանի դեսպանատունը բողոքարկել է ձերբակալությունը։
Ռուսաստանի արտաքին գործերի նախարարությունը նշել է, որ Վիեննայի կոնվենցիայի համաձայն՝ դիվանագիտական սուրհանդակները «օգտվում են անձնական անձեռնմխելիությունից և չեն ենթարկվում որևէ տեսակի ձերբակալման կամ կալանքի»:
