Հավաքական անվտանգության պայմանագրի կազմակերպության (ՀԱՊԿ) երկրները շարունակում են Հայաստանը համարել ասոցիացիայի լիիրավ անդամ, սակայն այս կարգավիճակը ենթադրում է կազմակերպության շրջանակում բոլոր պարտավորությունների կատարում։ Այս մասին լրագրողներին հայտնել է ՌԴ արտաքին գործերի նախարար Սերգեյ Լավրովը ՀԱՊԿ արտաքին գործերի նախարարների խորհրդի (ՀԱՊԿ ԱԳՆԽ) նիստից հետո, հաղորդել է ՏԱՍՍ-ը։
«Մենք նախկինի պես Հայաստանը համարում ենք այս կազմակերպության լիիրավ անդամ, բայց, իհարկե, լիիրավ անդամակցությունը ենթադրում է մասնակցություն և ՀԱՊԿ կանոնադրական փաստաթղթերից բխող բոլոր պարտավորությունների կատարում։ Այդ թվում, ի դեպ, անդամավճարների մուծում»,- ասել է նախարարը։
Միաժամանակ նա նշել է, որ ՀԱՊԿ արտաքին գործերի նախարարների խորհրդի մասնակիցները «նկատել են, որ ՀՀ արտաքին գործերի նախարարը կրկին հրաժարվել է մասնակցել այս միջոցառմանը»։
«Մենք ելնում ենք այն բանից, որ մեր պետությունների ղեկավարները, երբ հանդիպել են ՀԱՊԿ շրջանակում, նույնպես նկատի են ունեցել ՀԱՊԿ-ի նկատմամբ Հայաստանի վերաբերմունքի փաստը»,- ավելացրել է Լավրովը։
Նրա խոսքով՝ Հայաստանի ղեկավարության հայտարարությունները վկայում են, որ միտումները զարգանում են «բազմավեկտոր համատեքստում»։
«ՀՀ վարչապետը վերջերս հայտարարել է, որ շուտով կանցնի Եվրասիական տնտեսական միության և Եվրամիության միջև իր ժամանակահատվածը։ Հայաստանի ղեկավարությունից ինչ-որ մեկը հայտարարել է, որ մոտ ապագայում անհրաժեշտ կլինի վերջնականապես որոշում կայացնել ՀԱՊԿ-ի վերաբերյալ։
Մենք որևէ ճնշում չենք գործադրում Հայաստանի իշխող շրջանակների վրա, մենք կսպասենք այս բոլոր հարցերի շուրջ պարզաբանումներին, բայց մենք բոլորս հասկանում ենք, որ եթե Հայաստանը հրաժարվի իր դաշնակիցներից, իր ամենամոտ գործընկերներից, իր հարևաններից, քիչ հավանական է, որ դա օգուտ բերի հայ ժողովրդին»,- նշել է ՌԴ ԱԳՆ ղեկավարը։
