Առողջապահության համաշխարհային կազմակերպությունը (ԱՀԿ) բնակչության առողջության համար ռիսկը գնահատում է ցածր ՌԴ Իրկուտսկի մարզում Սիբիրի և Հեռավոր Արևելքի Իրկուտսկի հակաժանտախտային ինստիտուտի աշխատակցուհու մոտ «անհայտ ծագման թոքաբորբի» հայտնաբերման պատճառով, որը հանգեցրել էր նրա մահվան։ ԱՀԿ-ն կապի մեջ է Ռուսաստանի սանիտարական մարմինների հետ: Այս մասին ՏԱՍՍ-ին հայտնել է ԱՀԿ-ի ներկայացուցիչ Քրիստիան Լինդմայերը։
«ԱՀԿ-ն կապի մեջ է Ռուսաստանի առողջապահական մարմինների հետ՝ դեպքը, դրա հանգամանքները, իրականացվող լաբորատոր հետազոտությունները և դրանց արդյունքները, շփումների հետագծման հիմնավորումը և շփում ունեցած անձանց առողջական վիճակը, ինչպես նաև միջազգային հանրային առողջության համար հնարավոր հետևանքները ճշտելու նպատակով», — ասել է նա։
Ավելի վաղ «Ռոսպոտրեբնադզորի» մամուլի ծառայությունը հայտնել էր, որ Իրկուտսկի մարզում սանիտարահամաճարակային իրավիճակը կայուն է, իսկ կանխարգելիչ միջոցառումները և անհայտ ծագման թոքաբորբ ախտորոշված կնոջ հետ շփում ունեցած անձանց բժշկական հսկողությունը մոտենում են ավարտին։
Իրկուտսկի մարզում հնարավոր վարակի մասին տարածված տեղեկությունները մեկնաբանելիս Ռուսաստանի նախագահի մամուլի քարտուղար Դմիտրի Պեսկովը ավելի վաղ նշել էր, որ մարդիկ պետք է առաջնորդվեն Ռուսաստանի սանիտարական վերահսկողության մարմնի՝ «Ռոսպոտրեբնադզորի» գնահատականներով, այլ ոչ թե ասեկոսեներով և անհիմն շահարկումներով։
