Իրանի Իսլամական Հանրապետության նախագահ Մասուդ Փեզեշքիանը երկրների տարածքային ամբողջականության փոխադարձ հարգանքն ու ընդունումը և այդ սկզբունքներին հետևելը կայունության հիմնական պայման է համարում։
«Արմենպրես»-ի հաղորդմամբ՝ այս մասին հայտնում է IRNA գործակալությունը՝ մանրամասնելով Իրանի նախագահի՝ Բելառուս կատարած այցի շրջանակներում ունեցած հանդիպումները։
Իրանի նախագահը շեշտել է, որ արտասահմանում իրանցիների հետ հանդիպելը արժեքավոր հնարավորություն է, որը ամրապնդում է հայրենակիցների միջև հուզական և ինքնության կապը։
Փեզեշքիանը Իրանի ներսում միասնությունն ու համախմբվածությունը գնահատել է որպես նշանակալի նվաճում՝ պնդելով, որ այս համերաշխությունը շարունակում է ծաղկել՝ չնայած արտաքին ճնշումներին։
«Փեզեշքիանը վերահաստատեց Իսլամական Հանրապետության սկզբունքային քաղաքականությունը՝ պաշտպանելով խաղաղությունը և խուսափելով սպառազինությունների մրցավազքից, հաստատելով, որ սկզբից Իրանի իշխանությունները հայտարարել են, որ զենք չեն փնտրում, և իրենց գլխավոր նպատակը միասնությունն ու համախմբվածությունն է Իրանի սահմաններում, ինչպես նաև տարածաշրջանային ներդաշնակության խթանումը»,-նշել է իրանական լրատվամիջոցը։
Իրանի նախագահը նաև համագործակցության կոչ է արել բոլոր քաղաքացիներին և մտավորականներին՝ իրական անկախության և ազգային հպարտության հասնելու համար։
Իրանի նախագահ Մասուդ Փեզեշքիանը պաշտոնական այցով Բելառուս է ժամանել օգոստոսի 19-ին։ Մինչ այդ նա երկօրյա պաշտոնական այցով գտնվում էր Հայաստանում, որտեղ հանդիպումներ էր ունեցել վարչապետ Նիկոլ Փաշինյանի և նախագահ Վահագն Խաչատուրյանի հետ։
