Քաղաքագետ Արա Պողոսյանի ֆեյսբուքյան գրառումը.
«Հնդկաստանի Զինված ուժերը սկսել են լայնամասշտաբ ռազմական օպերացիա «Սինդուր» անվամբ։
Ըստ հնդկական կողմի, հարվածները հասցվել են ահաբեկչական խմբերի ճամբարներին Պակիստանի հսկողության տակ գտնվող Քաշմիրի շրջանում։
Պակիստանյան կողմը հայտնում է, որ վնասվել է քաղաքացիական ենթակառուցվածքը, ինչի արդյունքում Քաշմիրի շրջանում առաջացել են հոսանքի խափանումներ։
Հետաքրքիրն այն է, որ պակիստանյան կողմը հայտարարել է, իբրև թե Հնդկաստանը «առանց պատճառի ագրեսիա» է սկսել, ինչին պատրաստ են պատասխանել իրենց հարմար ժամանակ և իրենց հարմար ձևով։
Բնականաբար, Պակիստանն ունենալով ահաբեկչական խմբավորումների հետ համագործակցության փորձ, ակնհայտ է, որ ո՛չ միայն կապ ունի վերջերս տեղի ունեցած ահաբեկչության հետ, այլև նոր ահաբեկչական գործողություններ կարող է ձեռնարկել։
Մյուս կողմից, ակնհայտ է, որ Հնդկաստանը փորձելու է հիմնովին լուծել Պակիստանի հարցը։ Նախորդ Հնդկա-պակիստանյան պատերազմները մեծամասամբ Հնդկաստանի առավելությամբ են ավարտվել, և եթե չլիներ Մեծ Բրիտանիայի և Չինաստանի գործուն աջակցությունը Պակիստանին, ամենայն հավանականությամբ Պակիստանը կենթարկվեր ծանր պարտության և դրա հետևանքներին։
Հնդկաստանի աճող հզորության և միջազգային հեղինակության ֆոնը բավարար է, որպեսզի այսօր Հնդկաստանը վճռի վերջնականապես լուծել Պակիստանի հարցը։ Հատկապես հիմա, երբ Պակիստանը Ուկրաինայի հետ կնքած գործարքի արդյունքում զրկվել է հրետանային արկերի բավականին լուրջ պաշարներից։
Սակայն հարցն այն է, թե արդյո՞ք հիմա է ժամանակը, թե՞ այս օպերացիան հետախուզական օպերացիա է, շոշափելու Պակիստանի հնարավորությունները։
Պատերազմի առիթ վստահաբար Պակիստանը դեռ շատ կտա, չէ՞ որ այն վերածվել է ահաբեկչական մտածողության կազմավորման»:
