«Ես նաև ասել եմ՝ «Արցախը Հայաստան է, և վերջ»։ Այո՛, ես այն մարդն եմ, ով դա ասել է։ Եվ այդ ասելու արդյունքում է, որ մենք հասել ենք այս կետին։ Եվ սա լավ կետ է։ Իշխան Սաղաթելյանը հիշեցրել է Նիկոլ Փաշինյանի այս հայտարարությունը՝ պնդելով, որ այն հերթական ինքնախոստովանությունն է՝ Արցախի հանձնման վերաբերյալ։
Սա սույն անձի ինքնախոստովանական ցուցմունքն է, որ Արցախը հանձնել է գիտակցաբար, 5000 մարդու գլուխ է կերել գիտակցաբար, 150000 մարդու անտուն, անհայրենիք, անգերեզման է դարձրել գիտակցաբար, որպեսզի, իր իսկ բնութագրմամբ, հասնի այս «լավ կետին»։
Խնդրում եմ ուշադրություն դարձնել. եթե մինչև հիմա Նիկոլ Փաշինյանն ասում էր, որ հայտարարել է՝ «Արցախը Հայաստան է, և վերջ», որովհետև այդ ժամանակ այդպես է մտածել և այդպես է տեսել հարցերի լուծման ճանապարհը, ապա հիմա շատ ուղիղ ասում է, որ հանձնել է Արցախը, 5000 մարդու գլուխ կերել է, Ադրբեջանի զորքերը բերել ու նստեցրել է Հայաստանի տարածքում՝ այս կետին հասնելու համար։
Եվ այս տեսանյութը նաև նրանց համար է, ովքեր դեռ կարծում են, թե՝ «խեղճ Նիկոլը, ի՞նչ աներ, ամեն ինչ որոշված էր, և այդպես էլ պետք է լիներ»։ Բնականաբար՝ ոչ։
Պատերազմը, պատերազմի արդյունքը և պատերազմի հետևանքները դա Նիկոլ Փաշինյանի կողմից գիտակցված և հետևողական քայլերի արդյունքն էր՝ իր բոլոր հետևանքներով։
Իսկ այն կետի մասին, որին հասել է իշխանությունը, ինչ վիճակում ենք և ինչ է դրան հետևելու, դրա մասին շատ ենք ասել և դեռ խոսելու ենք»։
