Արմավիր խոշորացված համայնքի բնակիչները փակել են Արմավիր֊Գյումրի ճանապարհը` պահանջելով, որ լուծում տրվի իրենց մթերքը իրացնելու խնդիրներին։
«Մենք խնդիր ունենք ու դրան լուծում չի տրվում։ Հիմնականում հենց դեղձի խնդիր կա, բայց մյուս մթերքն էլ չենք կարողանում իրացնել։ Գյուղացին էսօր «պոլնի» խնդրի տակ ա»,- լրագրողների հետ զրույցում ասաց գյուղացիներից մեկը։
Գյուղացիների հետ հանդիպման եկած Արմավիրի համայնքապետ Վարշամ Սարգսյանը «կաշվից դուրս էր գալիս» բողոքող գյուղացիներին համոզելու, որ կառավարությունը, մարզպետը գիշեր-ցերեկ ամեն ինչ անում են իրենց խնդիրները լուծելու, և որ ամեն ինչ շատ ճիշտ է արվում։ Ավելին` նա նշեց, թե մթերքի հարցը որոշ անձինք փորձում են քաղաքական թեմա դարձնել, ինչին հավաքվածները դեմ արտահայտվեցին։
Գյուղացիներից մեկը շեշտեց, որ իրենք երեկ էլ են եղել մարզպետարանում, մինչ այս պահն իրենց հարցին լուծում չի տրվել, որևէ առաջարկ չի արվել, իրենք էլ այս քայլին են դիմել, և եթե այսօր էլ իրենց խնդիրը չլուծվի, վաղն ամբողջ գյուղով են ճանապարհ փակելու։
