NEWS.am–ը գրում է․ Հովհաննավանքի եկեղեցում, որտեղ այսօր՝ հունվարի 15–ին, կարգալույծ հռչակված քահանաներն են պատարագ մատուցում, բացի Օհանավանի բնակիչներից, մասնակցում են նաև Թալինի բնակիչները՝ համայնքապետարանի պաշտոնյաների գլխավորությամբ։
Բացի այդ, Օհանավանի դպրոցի ուսուցչական կոլեկտիվի որոշ ներկայացուցիչներ և աշակերտներ այս պահին, դասի ժամին գնացել և մասնակցում են այդ պատարագին։
Այսօր առավոտից Հովհաննավանքի մոտ կենտրոնացած են ոստիկանության մեծաթիվ ուժեր։ Այստեղ է նաև Թալինի եկեղեցու արդեն նախկին հոգևոր հովիվ, կարգալույծ հռչակված տեր Թադեն։
Հիշեցնենք, որ Արագածոտնի թեմը բախումներից խուսափելու համար չեղարկել է Սուրբ Աստվածածին եկեղեցուց դեպի Հովհաննավանք նածխապես հայտարարված ուխտերթը։
Այսօր Հայ եկեղեցին նշում է սուրբ Հովհաննես Մկրտչի ծննդյան տոնը։ Արագածոտնի թեմը հայտնել էր, որ տոնի առիթով ուխտագնացություն–խաչերթ կանցկացվի։ ։ Թեմը նաև նշում է, որ իրենց հասած տեղեկություններով , այսօր Հովհաննավանքում հնարավոր են սադրիչ գործողություններ սուրբ պատարագը թույլ չտալու համար, հետեւաբար ուխտագնացություն–ուխտերթի փոխարեն սուրբ և անմահ պատարագ կմատուցվի Կարբիի սուրբ Աստվածածին եկեղեցում։
