Բերդ համայնքն այսօր՝ մայիսի 9-ին, մեծ շուքով և հանդիսավորությամբ է նշել Հայրենական մեծ պատերազմում նվաճած հաղթանակի 80-րդ տարեդարձը:

Կայացել է հանդիսավոր քայլերթ, որին մասնակցել են Բերդ համայնքի բոլոր՝ 17 բնակավայրերի ներկայացուցիչները: Բերդի համայնքապետարանի հարակից հրապարակում տեղի է ունցել միասնական տոնական միջոցառում:

Բերդի տարածաշրջանի հոգևոր հովիվ Տեր Արամ քահանա Միրզոյանը Տերունական աղոթք է հնչեցրել: Իսկ ելույթում նշել է. «Շնորհավորում եմ ամենքիս Հայրենական մեծ պատերազմում տարած հաղթանակի 80-րդ տարեդարձի առիթով: Որևէ ընտանիք անմասն չի մնացել  և իր ուրույն ներդրումն է ունեցել հաղթանակի կերտման գործում:  Բավական է միայն հիշել, որ Բերդի տարածաշրջանը՝ մեր համայնքը,  ճակատ է ուղարկել 5082 հայորդու: Նրանց  մեծ մասը չի վերադարձել: Սա նշանակում է, որ դա իսկապես եղել է Հայրենական պատերազմ: Հայրենական պատերազմում  տարած հաղթանակը կարողացել է դաստիարակել հայրենասեր և խիզախ սերունդ: Մեր պապերն  այնպիսի ոգի  են ժառանգել մեր հայրերին, որ ամենածանր ժամանակներում՝ 90-ականներին, կարողացել են կերտել  Արցախյան հաղթանակը, ինչպես նաև ազատագրել  հայկակական Շուշին:  Դժբախտաբար, մենք չգնահատեցինք մեր հաղթանակները, և ցավոք, այսօր  գլխիկոր ենք…»:

Պահեստազորի գեներալ-լեյտենանտ Անդրանիկ Մակարյանը ներկայացրել է հայ ժողովրդի  ներդրումը Հայրենական մեծ պատերազմում և հաղթանակի նվաճման գործում։ «Հաղթանակի կերտման գործում  իր հսկայական և ծանրակշիռ դերն է ունեցել մեր տաղանդավոր հայ ժողովուրդը: Պատերազմի տարիներին Հայաստանի Սովետական Սոցիալիստական Հանրապետության  ազգաբնակչությունը կազմում էր 1 մլն 50 հազար մարդ: Ռազմակաճակատ է մեկնել 300 հազարը, 200 հազար հայորդի՝ Խորհրդային Միության այլ տարածքներից, 100 հազարը՝ սփյուռքից:  Այսպիսով՝ երկրորդ համաշխարհային պատերազմին մասնակցել է շուրջ 600 000 հայորդի: Մեծ է եղել Հայրենական մեծ պատերազմում հայկական ազգային դիվիզիաների դերն ու նշանակությունը»,- նշել է Անդրանիկ Մակարյանը, ապա հավելել. «Սիրելի՛ ժողովուրդ, Հայրենական մեծ պատերազմին մասնակցած մեր պապերի թոռները, որոնց բաժին ընկավ Արցախյան շարժումը, իրենց խնդիրը պատվով կատարեցին, հասան Շուշի, ազատագրեցինք Արցախը: Ի՞նչ է անհրաժեշտ անել. դուրս գալ այս ծանր վիճակից, համախմբվել, որպեսզի ի կատար ածենք մեր պապերի կիսատ մնացած երազանքը»:

Միջոցառումն ելույթով եզրափակել է Բերդ համայնքի ղեկակավար Աստղիկ Հակոբյանը. «Սիրելի՛ հայրենակիցներ, պատիվ ունեմ ողջունելու և շնորհավորելու Հայրենական Մեծ  պատերազմում տարած հաղթանակի 80-ամյակի կապակցությամբ: Հաղթանակ, որ ձեռք է բերվել արյան գնով, արիությամբ:  80 տարի առաջ մեր պապերի կերտած հաթանակը պատմության մեջ մնաց որպես  միասնականության և համախմբվածության հաղթանակ: Երախտագիտությունս եմ հայտնում  բոլորիդ այսօրվա միջոցառմանը ներկա գտնվելու համար: Թո՛ղ մեր միասնականությունը ուժ ու եռանդ, ոգևորություն   ներշնչի, ունենանք նո՛ր հաղթանակներ՝ հանուն ապագայի, հանուն մեր սուրբ երկրի»:

Ելույթ են ունեցել Բերդի համայնքային մշակույթի տան պարային խմբերը:

Միջոցառման մասնակիցները հարգանքի տուրք են մատուցել բոլոր ժամանակներում նահատակված հայորդիների հիշատակին՝ ծաղիկներ խոնարհելով Արցախյան պատերազմների ընթացքում նահատակված տավուշցիների, 44-օրյա պատերազմի ընթացքում նահատակված հայորդիների հիշատակը հավերժացնող հուշակոթողների և Անհայտ զինվորի հուշարձանի մոտ:

Միջոցառումը՝ տեսանյութում։