Արցախի ներկայացուցչության շենքը Հայաստանում ապրող արցախցիների համար հայրենիքի կտոր է, ու Ադրբեջանն ունի այս շենքի վրա հավակնություն՝ որպես Երևանի ադրբեջանական թատրոն։ Մենք երկու իրականության մեջ ենք ապրում, երբ արցախցիներից փորձում են վերցնել հայրենիքի վերջին կտորը, և նույն ժամանակ բացվում է, ֆինանսավորվում է Երևանի ադրբեջանական թատրոնը։ Այս մասին լրատվամիջոցների հետ հանդիպմանը ահազանգել է «Ուժեղ Հայաստան» դաշինքի պատգամավորության թեկնածու Նարեկ Կարապետյանը։
Նա ուշադրություն է հրավիրել, որ իր ետևում Արցախի ներկայացուցչության շենքն է։
«Սա երկու Հայաստանների ցուցիչ է։ Այս շենքի վրա հավակնություն ունի Բաքվում գործող Արևմտյան Ադրբեջանի թատրոնը։ Բաքվում կա Արևմտյան Ադրբեջանի, Երևանի թատրոն, Երևանի ադրբեջանական թատրոն, և այս շենքի վրա, այս պահին, հենց այդ թատրոնը, որը վերակառուցվել է Ադրբեջանում, և որի մասնաշենքերից մեկը 4 ամիս առաջ բացվել է, մարդիկ աշխատում են այնտեղ, և անունը Երևանի ադրբեջանական թատրոն է։ Համացանցը բաց է, կարող են բոլորը նայել, ֆինանսավորումը կատարվում է երկրի մշակույթի նախարարության կողմից, բացմանը ներկա է եղել երկրի մշակույթի նախարարը»,- տեղեկացրել է Կարապետյանը։
Նա Արցախի Հանրապետությանը պատկանող այդ շենքը խլելու գործընթացը բացատրել է այն հանգամանքով, որ Ադրբեջանը հավակնություններ ունի Հայաստանում մշակութային հիմնավորումներ անելու։
«Ալիևն այդ հայտարարությունն արել է գիտնականների մոտ, չի արել դա, օրինակ, ճարտարագետների մոտ։ Նա ասել է՝ հիմք ստեղծեք, որ մենք ունենանք հավակնություն։ Իր խոսքի մեջ կա՝ դուք պետք է ստեղծեք հիմք»,- հիշեցրել է Կարապետյանը։
Կարապետյանը նաև անդրադարձել է արցախցիների ընտրական իրավունքին։
«2021 թվականին արցախցիները մասնակցել են Հայաստանի ընտրություններին, իսկ ինչո՞ւ հիմա չեն մասնակցում, հիմա նման խնդիր առաջացել է, քանի որ այս իշխանության դեմքը արցախցիները արդեն տեսել են։ Լավ է, որ մեր մյուս հայրենակիցներն այլ տարածաշրջաններում դեռ այնքան չեն տեսել, որքան արցախցիներն են տեսել։ Փառք Աստծու, որ նման կերպ չեն տեսել»,- ասել է Կարապետյանը։
