Մենք երկար տարիներ փորձել ենք առանձին-առանձին ընտանիքներով պայքարել, իմանալու մեր երեխաների, մեր հարազատների ճակատագրերը, գնացել ենք տարբեր կառույցներ, հարցեր ենք տվել, պատասխանների ենք սպասել, վերջապես մենք ուզում էինք ստանալ մեր ամենակարևոր հուզող հարցը՝ որտե՞ղ են մեր երեխաները։ Այս մասին, այսօր՝ օգոստոսի 28–ին, մամուլի ասուլիսում նշեց 2020–ին անհայտ կորած զինծառայողի մայր Ասյա Դանիելյանը։
«Մենք մայրերով խումբ ստեղծեցինք, որ լինենք միասնական, հետևողական, ճիշտ աշխատանքներ վարենք, լինենք ավելի կառուցողական, ու հենց այդ տեղից էլ ստեղծվեց այս ասոցիացիան։
Ասոցիացիայի հիմնական նպատակն էլ գնալ երեխաների ճակատագրերի բացահայտման հետևից, այն նաև ընտանիքների պաշտպանության համար է։ Մեր ասոցիացիայի հիմնական կարևորությունը այն էր, որ մենք զբաղվում ենք բոլոր պատերազմների հետևանքներով՝ 1990–ականներ, 2020, 2023 պատերազմներ, ունենք նաև 2023-ի պայթյունի հետևանքով անհայտ կորածներ ու մեր ասոցիացիայի հիմնադիր անդամների մեջ հենց կան բոլոր այդ ժամանակահատվածների անհայտ կորածների ընտանիքներ։
Մեր ասոցիացիան սիրով կհամագործակցի բոլոր կառույցների հետ, կլինեն պետական մարմիններ, միջազգային կառույցներ, դոնոր կազմակերպություններ, հասարակական կազմակերպություններ, հետազոտական կենտրոններ՝ պահպանելով մեր չեզոքությունը։
Ուզում եմ բոլորը պարզ հասկանան, որ այս թվերի հետևում անհայտ կորածների ուղղակի թվեր չեն, նրանք մարդիկ են, նրանք ընտանիքներ են, նրանք սպասում են, տարիների սպասում են»,–ասաց նա։
