ԱՄՆ-ը, հնարավոր է, Իրանում գնում է դեպի ցամաքային պատերազմ՝ մի կործանարար սցենար, որը նախկինում մերժում էր Թրամփի վարչակազմը։ Ամերիկյան շատ լրատվամիջոցներ հայտնում են Մերձավոր Արևելք ԱՄՆ զորքեր տեղափոխելու մասին։ Այս մասին գրել է քաղաքագետ, Սթենֆորդի համալսարանի դոկտոր Արթուր Խաչիկյանը.
Եթե այս ծրագրերն իրականանան, ԱՄՆ-ի համար կկրկնվի Աֆղանստանի կամ Իրաքի սցենարը։ Այդ պատերազմները տևեցին համապատասխանաբար 8 և 20 տարի, խլեցին 4500 և 2500 ամերիկացի զինվորի, ինչպես նաև հարյուր հազարավոր իրաքցիների ու աֆղանների կյանք։ Դրանք սկսվեցին ժամանակավոր ռազմական հաղթանակով, բայց ավարտվեցին ԱՄՆ զորքերի պարտությամբ ու դուրսբերմամբ։
Հնարավոր է՝ ԱՄՆ-ը ժամանակավոր ռազմական հաջողության հասնի և գրավի Իրանի որոշ տարածքներ, հատկապես՝ Հորմուզի նեղուցի երկայնքով։ Գուցե նրանք ստիպեն բացել նավթի ճանապարհները։ Բայց դա ԱՄՆ-ին կքաշի հերթական անկանոն պատերազմի մեջ։ Դա կլինի մի նոր Աֆղանստան կամ Իրաք, որտեղ ստիպված կլինեն բախվել ապստամբների, զինված տարբեր խմբավորումների և ահաբեկչական հարձակումների հետ։ Նրանց դեմ կմղվի պարտիզանական պատերազմ՝ պարզունակ զենքերի, սովորական հրթիռների, անօդաչուների ու ինքնաշեն պայթուցիկների կիրառմամբ։ ԱՄՆ-ն արդեն պարտվել է նման պատերազմում նշված երկու երկրներում։
ԱՄՆ-ը բավարար ուժեր չունի Իրանի ողջ տարածքը գրավելու համար, և մնում է միայն հուսալ, որ այս կործանարար սցենարը չի քննարկվում։
Մարտի 19-ին Թրամփը հերքեց Իրան ցամաքային զորքեր ուղարկելու ծրագրերը։
Մարտի 20-ին CBS-ը հայտնեց, որ Պենտագոնը պատրաստվում է Մերձավոր Արևելք ուղարկել 82-րդ օդադեսանտային դիվիզիան։ Սա կարվի ի հավելումն այն 2500 ծովային հետևակայինների, որոնք պետք է տեղափոխվեն ըստ Reuters-ի տվյալների։ Նախատեսվում է ուղարկել բանակի արագ արձագանքման ուժեր և ծովային հետևակի հատուկ ջոկատ։
Այժմ Մերձավոր Արևելք են տեղափոխվում հազարավոր ծովային հետևակայիններ։ Երեք ռազմանավ և հատուկ ջոկատից մոտ 2200 ծովային հետևակային այս շաբաթ ճանապարհ են ընկել Կալիֆոռնիայից, հայտնում են երկու ամերիկացի պաշտոնյա։ Սա ծովային հետևակի երկրորդ նման ջոկատն է, որն ուղարկվել է պատերազմի սկզբից ի վեր. տեղ հասնելու համար նրանցից կպահանջվի մի քանի շաբաթ։
Առաջինն ուղարկվել էր Խաղաղ օվկիանոսից և դեռևս շարժվում է դեպի տարածաշրջան։
«Բոքսեր» (Boxer) դեսանտային նավերի խումբը և 11-րդ ծովային հատուկ ջոկատը նախատեսվածից շուտ առաջ են շարժվում ԱՄՆ արևմտյան ափից։
Ըստ Wall Street Journal-ի տվյալների՝ Պենտագոնը երեք ռազմանավ և հազարավոր լրացուցիչ ծովային հետևակայիններ է ուղարկում Մերձավոր Արևելք։ «Մոտավորապես 2200–2500 ծովային հետևակային Կալիֆոռնիայում տեղակայված USS Boxer խմբից և 11-րդ ծովային հատուկ ջոկատից ուղևորվում են ԱՄՆ Կենտրոնական հրամանատարություն, որը պատասխանատու է Մերձավոր Արևելքում բոլոր ամերիկյան ուժերի համար», — մեջբերում է թերթը պաշտոնյաների խոսքերը։
Այս ուժերը կմիանան ավելի վաղ տեղափոխված ծովային հետևակայիններին, որոնք տարածաշրջան պետք է հասնեն այս շաբաթ։ Պենտագոնը Ճապոնիայից տարածաշրջան է ուղարկել 5000 հոգանոց USS Tripoli նավը և 31-րդ ծովային հատուկ ջոկատը (MEU), որոնք կմիանան այնտեղ արդեն իսկ տեղակայված մոտ 50 000 զինծառայողին, հայտնել է WSJ-ը։
ԱՄՆ վարչակազմը դիտարկում էր Խարք կղզի ցամաքային ուժեր ուղարկելու հնարավորությունը՝ մի կարևոր կենտրոն (հաբ), որով անցնում է իրանական նավթի արտահանման 90%-ը, — հայտնել է Reuters-ը՝ վկայակոչելով երեք իրազեկ աղբյուրի և ԱՄՆ երեք պաշտոնյայի։
Եթե այս ծրագրերն իրագործվեն, մեզ սպասում են հազարավոր զոհված ամերիկացիներ և տասնյակ հազարավոր զոհված իրանցիներ, քաղաքացիական և էթնիկ պատերազմներ, զինված ու ահաբեկչական խմբավորումների ակտիվության կտրուկ աճ Իրանում և ողջ Մերձավոր Արևելքում, տարածաշրջանի լիակատար քաոս և համաշխարհային տնտեսական մեծ ճգնաժամ։
