Հարավային Կովկասում չի կարող տևական խաղաղություն լինել, քանի դեռ հայ ռազմագերիներնը ազատ չեն արձակվել։ Այս մասին մամուլի ասուլիսի ընթացքում, որը նվիրված էր Ադրբեջանի կողմից հայ գերիների ապօրինի պահման հազարերորդ օրվան, հայտարարել է ԱՄՆ կոնգրեսական, Հայկական հարցերով խմբի համանախագահ Բրեդ Շերմանը։
«Հաշվի առնելով ադրբեջանական ուժերի կողմից հայ ռազմագերիների փաստագրված մահապատիժները, ներառյալ մի շարք մահապատիժներ, որոնք տեսագրվել և տարածվել են սոցիալական ցանցերում հենց կատարողների կողմից և փաստագրվել նաև Human Rights Watch կազմակերպության կողմից, կենսական կարևորություն ունի, որ Միացյալ Նահանգները հստակորեն պահանջի բոլոր հայ ռազմագերիների անհապաղ և անվերապահ ազատ արձակումը։ Ահա թե ինչու եմ փոփոխություն առաջարկել Ներկայացուցիչների պալատի արտաքին հարաբերությունների հանձնաժողովում: Ես այդ փոփոխությունն առաջարկել եմ նաև նախկինում: Այդ փոփոխության շուրջ բանակցել եմ հանձնաժողովի նախագահի հետ, և այժմ մենք ունենք նրա աջակցությունը մի փոփոխության համար, որում ասվում է, որ Ամերիկան պետք է օգտագործի իր տրամադրության տակ գտնվող բոլոր միջոցները՝ ռազմագերիների ազատ արձակմանը հասնելու համար։
Եվ դա պետք է տեղի ունենար դեռ 1000 օր առաջ։ Այս վարչակազմը ձգտում է ապահովել տևական խաղաղություն Հարավային Կովկասում, սակայն չի կարող լինել տևական խաղաղություն, քանի դեռ յուրաքանչյուր հայ ռազմագերի և քաղաքական բանտարկյալ ազատ չի արձակվել ադրբեջանական գերությունից և հնարավորություն չի ստացել վերադառնալ տուն՝ իր ընտանիքի մոտ»,- նշել է նա:
Հիշեցնենք՝ ԱՄՆ կոնգրեսական Բրեդ Շերմանի նախաձեռնությամ Բաքվում պահվող հայ գերիների հազարերորդ օրվա կապակցությամբ ԱՄՆ Կոնգրեսում մամլո ասուլիս է կազմակերպվել:
