Օրերս Նիկոլ Փաշինյանն աշխատանքային այցով գտնվում էր Թուրքիայում։ Նոյեմբերի 11-ին նա մեկնել էր Անթալիա՝ մասնակցելու ՄԱԿ-ի Կլիմայի փոփոխության մասին շրջանակային կոնվենցիայի COP31-ի առաջնորդների գագաթնաժողովին։
Սա Փաշինյանի երրորդ այցն էր Թուրքիա՝ պաշտոնավարման ընթացքում։ Առաջին անգամ նա Թուրքիա էր մեկնել 2023 թվականի հունիսի 3-ին՝ մասնակցելու Էրդողանի երդմնակալության արարողությանը, որը տեղի էր ունենում Անկարայում։
Երկրորդ այցը կայացել էր 2025 թվականի հունիսի 20-ին։ Փաշինյանը աշխատանքային այցով մեկնել էր Ստամբուլ, որտեղ հանդիպել էր Էրդողանի հետ։ Հանդիպման օրակարգում էին հայ-թուրքական հարաբերությունների կարգավորման գործընթացը, տարածաշրջանային զարգացումները և երկկողմ համագործակցության հնարավորությունները։
Երրորդ այցը, ինչպես նշեցինք, տեղի ունեցավ այս տարվա նոյեմբերի 11-ին, որի շրջանակներում ևս տեղի ունեցավ Փաշինյան-Էրդողան հանդիպում։
Իսկ հակառակ ուղղությամբ ի՞նչ է եղել։
2025 թվականի Թուրքիա այցի ժամանակ Փաշինյանը հայտարարեց, որ մտադիր է Էրդողանին հրավիրել Երևան։
Նույն թվականի հոկտեմբերի 27-ին արտգործնախարար Արարատ Միրզոյանը հայտարարեց, որ Էրդողանին և Ադրբեջանի նախագահ Իլհամ Ալիևին բանավոր հրավերներ են փոխանցվել։ Նոյեմբերի 4-ին Փաշինյանն արդեն հաստատեց, որ անձամբ պաշտոնապես հրավիրել է Թուրքիայի նախագահին՝ մասնակցելու Երևանում կայանալիք Եվրոպական քաղաքական համայնքի գագաթնաժողովին։
Միջոցառումը Երևանում անցկացվեց 2026 թվականի մայիսի 4-ին, սակայն Էրդողանը Հայաստան չեկավ։ Նրա փոխարեն Երևան ժամանեց Թուրքիայի փոխնախագահ Ջևդեթ Յըլմազը։
Թուրքիան հրավիրված էր նաև 2026 թվականի հոկտեմբերին Երևանում անցկացված COP17 համաժողովին, սակայն այս դեպքում ևս թուրքական կողմը ներկայացավ նախարարական մակարդակով։ Երևան ժամանեց Թուրքիայի գյուղատնտեսության և անտառային տնտեսության նախարար Իբրահիմ Յումաքլին։
Այսպիսով, երկու երկրների ղեկավարների միջև հանդիպումներն ու հրավերները շարունակվում են, սակայն այցերի հարցում պատկերը տարբեր է․ Փաշինյանը Թուրքիա գնալու առիթը բաց չի թողնում, Էրդողանը մերժում է հրավերները։
