Նիկոլ Փաշինյանի խոսքով՝ Հայաստանի նպատակը Եվրամիության անդամակցության թեկնածուի կարգավիճակը չէ, այլ ԵՄ լիարժեք անդամ դառնալը։ Այս մասին նա ասել է Euronews-ի «ԵՄ ընդլայնման գագաթնաժողով 2026»-ի շրջանակում՝ համաձայնելով հաղորդավարի դիտարկմանը։
«Մենք լավ հասկանում ենք, որ միաժամանակ հնարավոր չէ լինել ԵՄ և ԵԱՏՄ կազմում։ Եվ հասկանում ենք, որ ապագայում Հայաստանը պետք է ընտրություն կատարի, բայց մինչև այդ մենք պետք է այլընտրանք ստեղծենք, իրական քաղաքական հարց ուղղենք մեր ժողովրդին։
ՀՀ քաղաքացիները պետք է որոշեն՝ ցանկանում են մնալ ԵԱՏՄ-ի կազմում, թե ցանկանում են միանալ ԵՄ-ին։ Մենք ցանկանում ենք, որ հայ ժողովուրդը ժողովրդավարական ընտրություն կատարելու հնարավորություն ունենա»,- նշել է Փաշինյանը։
