Հարկային իրավախախտման առարկա հանդիսացող գույքի բռնագանձման մասին որոշումը կկայացվի իրավախախտման փաստն արձանագրող վարչական ակտի ուժի մեջ մտնելուց հետո։ Համապատասխան որոշումն ընդունվել է ՀՀ կառավարության սեպտեմբերի 17-ի նիստում։

Նշվում է, որ գործող կարգավորման համաձայն՝ գույքը բռնագանձելու որոշումը կայացվում է ավելի վաղ, քան իրավախախտման փաստն արձանագրող վարչական ակտը։ Ընդգծվում է, որ քայլերի ներկայիս հաջորդականությունը հաճախ բացասաբար է անդրադառնում քննության արդյունավետության վրա։

Հստակեցվում է, որ հարկային իրավախախտում հայտնաբերելու դեպքում հարկային հսկողություն իրականացնող պաշտոնատար անձը պետք է անհապաղ որոշում կայացնի տվյալ գույքի վրա արգելանք դնելու մասին։ Որոշումը պետք է արգելադրված գույքի նկատմամբ ապօրինի արարք կատարելու համար նախատեսված քրեական պատասխանատվության մասին նշում պարունակի։