Ադրբեջանի արտաքին գործերի նախարար Ջեյհուն Բայրամովը կրկին հայտարարել է, որ Հայաստանի և Ադրբեջանի միջև խաղաղության համաձայնագրի գործընթացի վերջնական ավարտը Բաքուն կապում է Հայաստանում նոր Սահմանադրության ընդունման հետ։ Այս մասին հայտնում են ադրբեջանական ԶԼՄ-ները:
Բայրամովը, լրագրողների հետ զրույցում անդրադառնալով հայ-ադրբեջանական հարաբերությունների կարգավորման գործընթացին, ասել է, որ վերջին շրջանում կարևոր քայլեր են իրականացվել, այդ թվում՝ պետական պաշտոնյաների և քաղաքացիական հասարակության ներկայացուցիչների միջև հանդիպումները։
«Գործընթացն ավարտելու համար Հայաստանում պետք է ընդունվի նոր Սահմանադրություն»,– ասել է Ադրբեջանի ԱԳ նախարարը։
Նրա խոսքով՝ այդ մասին, իր մեկնաբանությամբ, նշված է նաև Վաշինգտոնում ընդունված համատեղ հռչակագրում։
«Դրա ժամանակը և ժամկետները Հայաստանի ներքին գործընթացն են։ Մենք կսպասենք այս գործընթացի լիարժեք ավարտին և խաղաղության համաձայնագրի վերջնական ստորագրմանը»,– հայտարարել է Բայրամովը։
Ադրբեջանի ԱԳ նախարարը նաև նշել է, որ պաշտոնական Բաքուն հետևում է Հայաստանում սահմանադրական փոփոխությունների գործընթացին, իսկ Ադրբեջանի դիրքորոշումը շարունակում է մնալ անփոփոխ։
Բայրամովի այս հայտարարությունը համահունչ է Ադրբեջանի՝ նախկինում հնչեցրած դիրքորոշմանը։ Մասնավորապես, 2026 թվականի հուլիսի 9-ին նա հայտարարել էր, որ եթե Հայաստանի նոր Սահմանադրությամբ վերացվեն այն դրույթները, որոնք, Ադրբեջանի պնդմամբ, տարածքային պահանջ են ենթադրում Ադրբեջանի նկատմամբ, ապա խաղաղության համաձայնագրի ստորագրման համար խոչընդոտ չի մնա։
