Կառավարության այսօրվա՝ օգոստոսի 13-ի նիստում ներառված է նախագիծ, որով մաքսատուրքից ազատման արտոնություն կտա Սամվել Ալեքսանյանին պատկանող «ԱԼԵՔՍ ՏԵՔՍՏԻԼ» սահմանափակ պատասխանատվությամբ ընկերությանը։
Համաձայն հիմնավորման, կառավարության 2025 թվականի դեկտեմբերի 11-ի N 1817-Ա որոշմամբ բավարարվել էր գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատման արտոնությունից օգտվելու համար «ԱԼԵՔՍ ՏԵՔՍՏԻԼ» սահմանափակ պատասխանատվությամբ ընկերության կողմից ներկայացված հայտը: «ԱԼԵՔՍ ՏԵՔՍՏԻԼ» ՍՊ ընկերության կողմից ներմուծվող հումքը նախատեսվում է օգտագործել հագուստի արտադրության համար։ Հաշվի առնելով, որ ներմուծվող ապրանքները ՀՀ հասնելուն պես պարզվել է, որ որոշմամբ հաստատված հավելվածում առկա որոշ ապրանքատեսակների անվանումները և տեխնիկական բնութագրերը սխալ են նշվել՝ ներկայումս անհրաժեշտություն է առաջացել կատարել փոփոխություններ դրանք շտկելու ուղղությամբ։
Միաժամանակ, հաշվի առնելով պատվերների մեծ քանակը, նաև անհրաժեշտություն է առաջացել ներմուծել 85․4 մլն դրամի չափով հումքի լրացուցիչ խմբաքանակ՝ առաջիկա արտադրական պրոցեսի բնականոն ընթացքը չխաթարելու համար։
Իրականացվող փոփոխությունների արդյունքում ապրանքների ընդհանուր արժեքը կկազմի 1․7 մլրդ դրամ։ Սամվել Ալեքսանյանին պատկանող բիզնեսին մաքսատուրքից ազատման հերթական արտոնությունը գնահատվում է 113․8 մլն դրամ։
Որոշման նախագիծը պատրաստել է Գևորգ Պապոյանի ղեկավարած նախարարությունը։
