ԱՄՆ նախագահ Դոնալդ Թրամփը չորեքշաբթի օրը Սպիտակ տանը դռնփակ հանդիպում կունենա ՆԱՏՕ-ի գլխավոր քարտուղար Մարկ Ռյուտեի հետ։ Այս մասին վկայում է ամերիկյան առաջնորդի հունիսի 24-ի աշխատանքային ժամանակացույցը։
Ըստ օրակարգի՝ բանակցությունները կմեկնարկեն Վաշինգտոնի ժամանակով ժամը 15:30-ին՝ Սպիտակ տան Օվալաձև աշխատասենյակում։ Չնայած Սպիտակ տան վարչակազմը նախկինում սովորաբար թույլ էր տալիս լրագրողներին ներկա գտնվել Թրամփի և ՆԱՏՕ-ի գլխավոր քարտուղարի հանդիպումների մեկնարկին, այս անգամ բանակցություններն անցնելու են ամբողջությամբ փակ դռների հետևում։
Euronews-ը հայտնում է, որ հուլիսին Անկարայում սպասվող ՆԱՏՕ-ի գագաթնաժողովից առաջ դաշինքի գլխավոր քարտուղարը մեկնել է ԱՄՆ՝ փորձելով մեղմել «անդրատլանտյան լարվածությունը»։
Սպիտակ տան ղեկավարի հետ բանակցություններից բացի, Ռյուտեն Վաշինգտոնում հանդիպումներ կունենա նաև ԱՄՆ վարչակազմի բարձրաստիճան պաշտոնյաների հետ, ինչպես նաև հեռավար ձևաչափով կմասնակցի E5 խմբի երկրների (Լեհաստան, Գերմանիա, Ֆրանսիա, Իտալիա և Մեծ Բրիտանիա) գագաթնաժողովին։
